Toshkent xalqaro aeroportining jo‘nab ketish terminali oldida test rejimida O‘zbekistonda birinchi bo‘lib to‘liq avtomatlashtirilgan avtoturargoh ishga tushirilgan edi. Bu inson aralashuvisiz ishlaydigan birinchi avtoturargoh hisoblanadi, deb xabar bermoqda Uzbekistan Airports axborot xizmati.
Avtoturargoh tizimi avtomobillarning davlat raqamlarini mustaqil ravishda eslab qoladi hamda kirish/chiqish va to‘lovlarni qabul qilish imkonini beradi. Haydovchilarga to‘xtash joyi uchun to‘lov amalga oshirishning ikki usuli taklif etiladi. Avtomashina raqamini avtomatik identifikatsiyalangan taqdirda, to‘xtash joyi uchun to‘lov maxsus avtoturargoh hisoblagichi orqali naqd pulda yoki QR kod yordamida amalga oshirilishi mumkin. To‘lovni amalga oshirish uchun mashina raqami terminalga kiritiladi, shundan so‘ng to‘lov miqdori parkometr displeyida paydo bo‘ladi. Agar mashinaning raqamini avtomatik ravishda aniqlash imkoni bo‘lmasa, avtoturargohga kirishda o‘rnatilgan terminaldan maxsus chiptani olib, chiqishda ushbu chipta yordamida to‘lov amalga oshirish lozim.
Uzbekistan Airports avtoturargohlarini rekonstruksiya qilish doirasida “K2” kompaniyasidan Yaponiyaning Amano brendidagi avtoturargoh uskunalari xarid qilindi va o‘rnatildi. To‘liq integratsiyalashgan tizim butun jarayonni — kirish, chiqish va to‘lovni avtomatlashtirish imkonini beradi. O‘zbekistonda bugungi kunda bunday yechimlar, ayniqsa, to‘lovdan so‘ng mijozga avtomatik ravishda qaytim beradigan tizimlar hozirda yo‘q. Hozirda tizim test rejimida ishlamoqda. Shu bilan birga, avtomobil raqamlarining qo‘shimcha shablonlarini qo‘shish, to‘lov usullarini to‘ldirish bo‘yicha ba’zi texnik nyuanslar yakunlanmoqda, shuningdek, avtomobil haydovchilarini yangi texnologiyalarga o‘rgatish ustida ham ish olib borilmoqda, — dedi IT departament direktori Kirill Lavrik.Ayni paytda barcha yangi va eski banknotalar qaytimni olish imkoniyati bilan to‘lovga qabul qilinadi. Shu bilan birga, Payme to‘lov tizimi yordamida QR kod orqali to‘lovni amalga oshirish mumkin. Yaqin vaqt ichida boshqa to‘lov tizimlari, shuningdek, Visa, Mastercard, Humo va UzCard bank kartalari orqali to‘lovlar amalga oshirish imkoniyati paydo bo‘ladi. Shuningdek, mobil ilova bilan avtoturargohning integratsiyalashuvi ham yakunlanmoqda, bu esa avtomobildan chiqmasdan to‘lovni amalga oshirish imkonini beradi.
Inson omilisiz ishlaydigan avtomatlashtirilgan avtoturargohning ishga tushirilishi nafaqat qulaylik va yangi texnologiyalar, bugungi kunda ularsiz hech qanday soha rivojlana olmaydi, balki korrupsiya va poraxo‘rlikdan xalos bo‘lish imkonini beruvchi muhim qadamdir. Tizimning ikki kunlik ishlashi natijasida olingan ma’lumotlarga ko‘ra, haydovchilarning 99 foizi avtoturargoh uchun naqd pulda to‘lov amalga oshiradi, bu esa mablag‘larning noqonuniy chiqib ketish imkoniyati kattaligidan dalolat beradi. Avtomatlashtirish korrupsiya faktini butunlay istisno qiladi — terminal bilan kelishib bo‘lmaydi va u daromadlarni yashirmaydi. To‘liq moliyaviy shaffoflik, — dedi Uzbekistan Airports boshqaruvi raisi Ra’no Jo‘rayeva.Bu avtoturargohlarni avtomatlashtirishga qaratilgan birinchi qadam. Ayni paytda ikkinchi avtoturargohda – kelish terminali oldida uskunalarni o‘rnatish va sozlash ishlari olib borilmoqda. Kelgusida poytaxt aeroportining qolgan avtoturargohlari ham to‘liq avtomatlashtiriladi.
Izoh (0)