AQSH prezidenti Donald Tramp 15-avgust kuni Rossiya rahbari Vladimir Putin bilan Alyaskadagi uchrashuvda hududlar masalasini muhokama qilmaydi. Bu haqda manbalarga tayanib, NBC xabar berdi.
Tramp Ukraina prezidenti Vladimir Zelenskiy ham ishtirok etgan Yevropa yetakchilari bilan onlayn-konferensiyada shunday va’da bergan. U Putin bilan muzokaralarda “o‘t ochishni so‘zsiz to‘xtatish”ga erishmoqchi ekanini aytgan. AQSH prezidenti va Yevropa yetakchilari kelajakdagi hududlar hamda tinchlik shartlarini muhokama qilishda Ukraina ishtirok etishi kerakligiga kelishib olgan.
Ba’zi yevropalik yetakchilarda Tramp “Putin bilan uchrashuv natijalariga nisbatan unchalik optimist emas” degan taassurot paydo bo‘lgan. Manbalardan biriga ko‘ra, Tramp AQSH ishtirokida erishilishi mumkin bo‘lgan Ukraina xavfsizlik kafolatlarini qo‘llab-quvvatlagan.
Putin 6-avgust kuni Kremlda AQSH prezidenti maxsus vakili Stiv Uitkoff bilan uchrashdi. Unda Rossiya prezidenti tinchlik kelishuviga oid shartlarini bayon qildi: o‘t ochishni to‘xtatish va front chizig‘ini hozirgi pozitsiyalarda muzlatish evaziga Ukrainaning Donbassdan voz kechishi. Keyinchalik u Xerson va Zaporoje viloyatlarining Rossiya egallab olgan qismlaridan voz kechishga tayyor emasligini aytdi.
Tramp va Putin o‘rtasidagi muzokara Ankorij shahrida bo‘lib o‘tadi. Xavfsizlik talablariga javob berishi mumkin bo‘lgan obyekt esa Elmendorf-Richardson harbiy bazasi hisoblanadi. Uchrashuv joyini tanlashda Yevropa variantlari darhol rad etilgan. Bunga Gaagadagi Xalqaro jinoiy sud (XJS) tomonidan Putinni hibsga olish uchun berilgan order sabab bo‘lgan. Shu bilan birga, Putin va Tramp bilan yaqin munosabatda bo‘lgan Vengriya varianti ham ko‘rib chiqilgan edi.
Izoh (0)