Yevropa ittifoqi Gruziya hukumatiga ajratilgan 121 million yevroni qaytarib oldi.
“Yevropa ittifoqi bu mablag‘larni boshqa maqsadlarga yo‘naltirishni rejalashtirmoqda”, dedi Yevropa ittifoqi diplomatiyasi rahbari Josep Borrel.
Uning so‘zlariga ko‘ra, mablag‘lar “fuqarolik jamiyati va to‘g‘ridan to‘g‘ri gruzin xalqiga foyda keltiradigan dasturlar” uchun ishlatiladi.
Oktyabr oyida Gruziyada bo‘lib o‘tgan parlament saylovlari mamlakatning “hozirgi hukumat davridagi demokratik chekinishini” tasdiqlaganiga munosabat bildirgan holda, YI Gruziya qurolli kuchlarini Yevropa tinchlik jamg‘armasi orqali qo‘llab-quvvatlashni, shuningdek, Gruziyaga to‘g‘ridan to‘g‘ri 121 million yevro ajratishni bekor qildi.
Saylovdagi hodisalarni diqqat bilan o‘rganish uchun Bryussel Gruziyaga siyosiy missiya yuborishni rejalashtirmoqda. Saylovlar buzilishiga o‘z bahosini taqdim etish uchun esa Demokratik institutlar va inson huquqlari bo‘yicha byuroning Gruziyadagi saylovni kuzatish missiyasi rahbari taklif etiladi.
“Gruziya orzusi” yetakchilari gruzin xalqining orzu-umidlariga qarshi chiqib, mamlakatni Yevropa ittifoqi yo‘lidan uzoqlashtirdi. Biz hammamiz Gruziyani Yevropa yo‘liga qaytarishni xohlaymiz”, deya ta’kidladi Borrel.
U Yevropa ittifoqining eshigi Gruziya uchun ochiq qolishini qo‘shimcha qildi.
Gruziyadagi parlament saylovlaridan ko‘p o‘tmay, Yevropa ittifoqi diplomatiyasi rahbari xalqaro kuzatuvchilar saylov kampaniyasi paytida ham, ovoz berish kuni ham qonunbuzarliklarni qayd etib, “saylovlarni erkin va adolatli o‘tganini tan olmaganini” aytdi. Ular, xususan, saylovchilarni qo‘rqitish va pora olish, davlat xizmatchilariga bosim o‘tkazish, bir necha marta ovoz berish va byulletenlarni qo‘yib yuborish holatlari haqida gapirgan.
Qo‘shma Shtatlar va YI davlatlari Gruziyadagi ehtimoliy firibgarlik va saylov jarayoniga da’vo qilingan aralashuvni tergov qilishga chaqirgan.
Rasmiy ma’lumotlarga ko‘ra, 26-oktyabr kuni bo‘lib o‘tgan saylovlarda hukmron “Gruziya orzusi” partiyasi 53,93 foiz ovoz to‘plab, parlamentdagi 150 o‘rindan 89 tasini qo‘lga kiritgan edi. Shu bilan birga, “Gruziya orzusi” barcha yirik shaharlarda, jumladan, Tbilisida, shuningdek, xorijdagi saylov uchastkalarida muxolifat ustidan g‘alaba qozongan.
Parlamentga kirgan to‘rt muxolifat guruhi saylovlar soxtalashtirilganini da’vo qilib, ovoz berish natijalarini tan olmagan. Ular Gruziya sudlari va prokurorlari mustaqil emasligini va hokimiyatga bo‘ysunishini ta’kidlab, xalqaro tergov o‘tkazilishini talab qilmoqda. Gruziya prezidenti Salome Zurabishvili ham “Gruziya orzusi” saylovlarni soxtalashtirganini aytib, yangi saylovlar o‘tkazishga chaqirgan.
Prezident 18-noyabr kuni mamlakat aholisiga qilgan maxsus murojaatnomasida 26-oktyabrdagi saylovda yashirin va umumiy ovoz berish tamoyillari buzilganini ta’kidlagan. U parlament saylovlari natijalari yuzasidan Konstitutsiyaviy sudga shikoyat qilishini bildirgan.
Zurabishvilining ta’kidlashicha, o‘tgan saylovlar mamlakat aholisining aksariyati tomonidan tan olinmagan.
“Nodavlat notijorat tashkilotlari va kuzatuvchi tashkilotlar bu saylovlarni tan olmaydi. Ular mamlakat ichida ham, tashqarisida ham saylovlar erkin va adolatli o‘tganini da’vo qilishdan o‘zini tiyadi. Oradan uch hafta o‘tdi, bizning asosiy demokratik hamkorlarimizdan birortasi bu saylovlarni tan olmadi”, dedi Gruziya yetakchisi.
Izoh (0)