Gruziya muxolifati va hukmron “Gruziya orzusi” partiyasi muxoliflari yangi saylovlar o‘tkazish talabi bilan Tbilisining asosiy magistrallaridan birini to‘sib qo‘ydi.
17-noyabr kuni kechqurun Tbilisi davlat universiteti binosi yonidagi yo‘lda namoyishchilar o‘ttizga yaqin chodir qurib, ularda tunab qolishdi. Ishtirokchilar qayta saylanishga erishgunlaricha norozilik chodirlarini avval poytaxtda, keyin esa butun mamlakat bo‘ylab turli joylarga ko‘chirishni rejalashtirgan.
Rasmiy ma’lumotlarga ko‘ra, 26-oktyabr kuni bo‘lib o‘tgan saylovlarda hukmron “Gruziya orzusi” partiyasi 53,93 foiz ovoz olib, parlamentdagi 150 o‘rindan 89 tasini qo‘lga kiritgan edi. Shu bilan birga, “Gruziya orzusi” barcha yirik shaharlarda, jumladan, Tbilisida, shuningdek, xorijdagi saylov uchastkalarida muxolifat ustidan g‘alaba qozongan.
Parlamentga kirgan to‘rt muxolifat guruhi saylovlar soxtalashtirilganini da’vo qilib, ovoz berish natijalarini tan olmagan. Ular Gruziya sudlari va prokurorlari mustaqil emasligini va hokimiyatga bo‘ysunishini ta’kidlab, xalqaro tergov o‘tkazilishini talab qilmoqda. Gruziya prezidenti Salome Zurabishvili ham “Gruziya orzusi” saylovlarni soxtalashtirganini aytib, yangi saylovlar o‘tkazishga chaqirgan.
Prezident 18-noyabr kuni mamlakat aholisiga qilgan maxsus murojaatnomasida 26-oktyabrdagi saylovda yashirin va umumiy ovoz berish tamoyillari buzilganini ta’kidlagan. U parlament saylovlari natijalari yuzasidan Konstitutsiyaviy sudga shikoyat qilishini bildirgan.
Zurabishvilining ta’kidlashicha, o‘tgan saylovlar mamlakat aholisining aksariyati tomonidan tan olinmagan.
“Nodavlat notijorat tashkilotlari va kuzatuvchi tashkilotlar bu saylovlarni tan olmaydi. Ular mamlakat ichida ham, tashqarisida ham saylovlar erkin va adolatli o‘tganini da’vo qilishdan o‘zini tiyadi. Oradan uch hafta o‘tdi, bizning asosiy demokratik hamkorlarimizdan birortasi bu saylovlarni tan olmadi”, dedi Gruziya yetakchisi.
Zurabishvili hukmron “Gruziya orzusi” partiyasiga tizimli muammolarni aniqlash va tuzatish, saylov kodeksiga o‘zgartirishlar kiritish, yangi Markaziy saylov komissiyasini shakllantirib, hukumat va parlamentning avvalgi tarkibi bilan qayta saylovlargacha ishlashni davom ettirishni taklif qildi.
Avvalroq muxolifat partiyalari Yevropa diplomatiyasi rahbari Josep Borrel va Yevroittifoq TIV rahbarlariga qo‘shma maktub yo‘llagan edi. Ular Yevropa ittifoqidan kelasi 30 kun ichida 2024-yilgi saylovlarni tekshirish uchun missiya tuzishni va xalqaro tergov natijalari ma’lum bo‘lgunga qadar Gruziya parlamentining qonuniyligini tan olmaslikni so‘ragan.
18-noyabr kuni Gruziya bosh vaziri Irakliy Kobaxidze muxolifatning Bryusselga yo‘llagan maktubiga izoh berib, o‘z raqiblarini Gruziya demokratik hukumatini ag‘darish va Gruziyani sovetlashtirish jarayonida ishtirok etgan bolshevik Sergo Orjonikidze bilan solishtirgan. Shu bilan birga, u muxolifatlarni zaiflashtirish Gruziyaning to‘g‘ri rivojlanishidagi “muhim vazifa” ekanini aytgan.
18-noyabr kuni bo‘lib o‘tgan YI kengashi yig‘ilishi yakunlariga ko‘ra, Yevropa ittifoqi TIV rahbarlari “Gruziya xalqini YIga kirish yo‘lida qo‘llab-quvvatlashga” tayyor ekanliklarini e’lon qilishgan, biroq ayni paytda Gruziya hukumatining Yevropa ittifoqi qadriyatlari va tamoyillariga zid bo‘lgan harakatlaridan xavotirda ekanini bildirgan.
Izoh (0)