Yevropa ittifoqi rasmiylari Xitoyni Rossiyaga harbiy yordam ko‘rsatayotganlikda gumon qilmoqda. YIga ko‘ra, Xitoy Rossiya armiyasiga dronlar yetkazib berayotgan bo‘lishi mumkin.
Germaniya tashqi ishlar vaziri Annalena Berbok 18-noyabr kuni Bryusselda bo‘lib o‘tgan YI yig‘ilishi chog‘ida hukumat Xitoy Rossiyaga bunday yordam berayotganini taxmin qilishini tasdiqlab, “bu tegishli oqibatlarga olib kelishini” ta’kidladi.
Avvalroq Yevropa ittifoqining tashqi harakatlar xizmati hozirda Xitoyda Rossiyaning Ukrainaga qarshi hujumi uchun dronlar ishlab chiqarilayotgani haqidagi dalillarni tekshirayotganini aytgan edi.
“Biz razvedka manbalaridan Xitoyda Rossiyaga yetkazib beriladigan va Ukrainaga qarshi urushda foydalaniladigan dronlarni ishlab chiqaradigan zavod borligi haqida xabar oldik”, degan edi YI vakili.
YI diplomatiyasi rahbari Josep Borrel Xitoyning Rossiyaga qurol-yarog‘ yetkazib berayotgani haqidagi maʼlumotni olishi bilan Pekinga qarshi sanksiyalar joriy qilish niyatini bildirgan. U, shuningdek, mazkur harakatlari uchun Xitoyni jazolashni talab qilgan.
Qayd etilishicha, hozirda Xitoy va Rossiya o‘rtasida harbiy texnika sohasida to‘g‘ridan to‘g‘ri hamkorlikni yo‘lga qo‘yish bo‘yicha ishlar olib borilmoqda. Agar bu ma’lumot tasdiqlansa, Xitoyga nisbatan sanksiyalar qo‘llanilishi mumkin. Xitoy hozircha bu ayblovlarni rad etmoqda.
YI diplomatlarining fikricha, Xitoyda dronlarni ishlab chiqarish Rossiya, Xitoy va Eronning qo‘shma loyihasidir.
Yevropa ittifoqi allaqachon Eronga Rossiyaga uchuvchisiz samolyotlar va ballistik raketalar yetkazib bergani uchun sanksiyalar kiritgan va hozirda Eronga qarshi yangi sanksiyalar paketini tasdiqlashga tayyorlanmoqda.
Izoh (0)