Shavkat Mirziyoyev Finlyandiya prezidenti Aleksandr Stubbni O‘zbekistonga taklif qildi. Bu haqda “O‘zbekiston 24” telekanalidagi “Menimcha” dasturida xabar berildi.
12-noyabr kuni Boku shahrida bo‘lib o‘tgan COP29 sammiti doirasida O‘zbekiston yetakchisi Finlyandiya prezidenti bilan uchrashuv o‘tkazgan edi. Uchrashuvda Aleksandr Stubb 2018-yili O‘zbekistonga kelganini esladi.
Shavkat Mirziyoyev bugungi kunda O‘zbekiston butunlay boshqa davlatga aylanganini aytdi.
“Sizni mamlakatimizga taklif qilaman. Sababi ko‘p narsani qayta tiklashimiz kerak. Bilasizmi, oxirgi yillarda maktab taʼlimida Finlyandiya modeli bo‘yicha ko‘p ishni amalga oshirdik. Nordik universitetini ochdik, u yerda 7500 nafar talaba o‘qimoqda. Shu bois maktab o‘quvchilari Finlyandiya haqida kattalardan ko‘proq maʼlumot bilishadi”, dedi O‘zbekiston prezidenti.
Finlyandiya prezidenti esa uning maslahatchisi O‘zbekistonga borishni ko‘p bora aytishini maʼlum qildi.
Shavkat Mirziyoyevning Ozarbayjonga tashrifi
Prezident Shavkat Mirziyoyev 12-noyabr kuni Boku shahrida bo‘lib o‘tgan BMTning Iqlim o‘zgarishi to‘g‘risidagi hadli konvensiyasi Tomonlari konferensiyasining 29-sessiyasi (COP29) doirasidagi Jahon yetakchilari sammitining yalpi majlisida nutq so‘zladi. Unda davlat rahbari qator tashabbuslarni ilgari surdi.
Shuningdek, Shavkat Mirziyoyev iqlim bo‘yicha sammit doirasida Yevropa kengashi raisi Sharl Mishel bilan uchrashdi. O‘zbekistonning Yevropa ittifoqi bilan ko‘p qirrali hamkorligini yanada kengaytirish masalalari ko‘rib chiqildi.
O‘zbekiston yetakchisi COP29 sammiti doirasida Finlyandiya prezidenti Aleksandr Stubb bilan ham uchrashuv o‘tkazdi. Unda 2025-yil yanvar oyida Xelsinki shahrida bo‘lib o‘tadigan Hukumatlararo komissiyaning navbatdagi yig‘ilishi va biznes forumiga puxta tayyorgarlik ko‘rish muhimligi taʼkidlandi.
Shavkat Mirziyoyev hamda Chernogoriya prezidenti Yakov Milatovich o‘rtasidagi uchrashuvda hukumatlararo komissiya tuzish va uning birinchi yig‘ilishini kelgusi yilda Toshkent shahrida biznes forumi bilan birgalikda o‘tkazish taklif etildi.
O‘zbekiston yetakchisi, shuningdek, Yevropa tiklanish va taraqqiyot banki prezidenti Odil Reno-Basso hamda Islom taraqqiyot banki prezidenti Muhammad bin Sulaymon al-Jassir bilan ham muzokaralar o‘tkazdi.
13-noyabr kuni O‘zbekiston, Ozarbayjon va Qozog‘iston rahbarlari “yashil” energiyani rivojlantirish va uzatish loyihasiga start berdi. Tadbirda so‘zga chiqqan Shavkat Mirziyoyev qayta tiklanuvchi energiya iqtisodiy maqsad emas, balki kelajakka qo‘shilayotgan hissa, kelgusi avlodlar oldidagi masʼuliyat tuyg‘usining natijasi ekanini taʼkidladi.
Shuningdek, Boku shahriga amaliy tashrif doirasida 13-noyabr kuni Shavkat Mirziyoyev Ilhom Aliyev bilan uchrashuv o‘tkazdi.
Bundan tashqari, Shavkat Mirziyoyev Chexiya va Gretsiya bosh vazirlari hamda Global ekologik fond (GEF) bosh direktori va raisi Karlos Rodriges bilan uchrashuv o‘tkazdi.
Davlat rahbari Boku shahrida BMTning Butunjahon iqlim sammitida (COP29) tashkil etilgan O‘zbekiston Milliy pavilyoni bilan ham tanishdi. Prezident Jahon savdo tashkiloti (JST) bosh direktori Ngozi Okonjo-Iveala bilan uchrashuv o‘tkazdi.
Shu bilan birga, Ozarbayjonlik shoir Akif Bag‘irov O‘zbekiston prezidentiga ozarbayjon tilida tayyorlagan “Shavkat Mirziyoyev fenomeni” kitobini taqdim etdi.
Izoh (0)