Gruziya parlamenti spikeri Shalva Papuashvili “xorijiy agentlar to‘g‘risida”gi qonunni imzoladi. Bu haqda u 3-iyun kuni bo‘lib o‘tgan brifingda ma’lum qildi.
Papuashvilining ta’kidlashicha, qonun imzolangandan so‘ng darhol kuchga kirgan. Endilikda Tbilisidagi muxolifat partiyalari Gruziya prezidenti Salome Zurabishvili taklif qilgan Gruziya Xartiyasini imzolamoqchi. Deyarli barcha muxolifat partiyalari avvalroq Xartiyani qo‘llab-quvvatlashlarini e’lon qilgan.
“Xorijiy taʼsirning shaffofligi to‘g‘risida”gi qonunda “xorijiy agentlar” reyestrini yaratish ko‘zda tutilgan. Unga 20 foizdan ortig‘i xorijiy kompaniya va shaxslar tomonidan moliyalashtiriladigan barcha notijorat yuridik shaxslar va ommaviy axborot vositalari kiritiladi.
Hukmron “Gruziya orzusi” partiyasi uni ikki marta parlamentga kiritgan. 2023-yil mart oyida, birinchi marta joriy qilinganidan so‘ng, u ko‘plab noroziliklar tufayli bekor qilingandi. Biroq 2024-yil aprelda “Gruziya orzusi” uni qayta kiritgan.
Ikkinchi marta, qonun muhokamasi bilan birga kelgan ommaviy noroziliklarga qaramay, u qabul qilingan. 14-may kuni Gruziya parlamenti uni uchinchi o‘qishda ma’qullagan. 18-may kuni prezident Salome Zurabishvili qonunga veto qo‘ygan, biroq parlament hukmron partiyaning ko‘pchilik ovozi bilan uni bekor qilishga muvaffaq bo‘lgan.
Tanqidchilar hujjatda Rossiyaning “xorijiy agentlar” qonuni bilan yaqqol o‘xshashliklarni ko‘rgandi, bu esa Rossiya rasmiylariga tanqidiy ommaviy axborot vositalari va tashkilotlarga nisbatan keskin choralar ko‘rish imkonini bergan. Gruziya hukumati mazkur qonun loyihasi davlat suverenitetini mustahkamlashda muhim ekanini da’vo qilmoqda. AQSH va Yevropa Ittifoqi Gruziyani bu qonunni qabul qilmaslikka chaqirgandi.
Izoh (0)