9-aprel kuni Gruziyaning “Yagona milliy harakat” (YMH) muxolifat partiyasi tarafdorlari ushbu siyosiy kuch asoschisi, hibsda saqlanayotgan Mixail Saakashvilini qo‘llab-quvvatlash maqsadida Tbilisi markazida miting o‘tkazdi. Euronews telekanali miting ishtirokchilari sonini bir necha ming kishi deb baholamoqda. Gruziya sobiq prezidentining tarafdorlari mitingga Gruziya va Ukraina bayroqlari, shuningdek, Yevropa Ittifoqi bayroqlarini ko‘tarib kelgan.
YMH raisi Levan Xabeishvili partiya nomidan rasmiylarga bir qancha talablar qo‘ydi: Saakashvili va uning bir qancha sheriklarini qamoqdan ozod qilish, deoligarxizatsiya (oligarxlarning har qanday sohaga ta’sirini cheklash) to‘g‘risidagi qonunni qabul qilish, sud tizimi va Markaziy saylov komissiyasini isloh qilish. Aynan mana shunday islohotlarni o‘tkazish talabini Bryussel Gruziyaning Yevropa Ittifoqiga kirishi bo‘yicha muzokaralarni davom ettirish uchun ilgari surayotgandi.
Saakashvilining qamoq shifoxonasidan yozgan maktubi
7-aprel kuni Politico nashri Saakashvilining maktubini chop etdi, unda siyosatchi turma kasalxonasida o‘layotgani haqida yozgan hamda AQSH, Yevropa Ittifoqi va xalqaro hamjamiyatni “hayotini saqlab qolish uchun hamma narsani qilishga” chaqirgan. Siyosatchining aytishicha, hibsda u muntazam ravishda jismoniy va ruhiy qiynoqlarga duchor bo‘lgan, og‘ir metallardan zaharlanish alomatlari bor. Gruziyaning sobiq prezidenti 20 dan ortiq og‘ir kasalliklardan aziyat chekayotganini, ularning barchasi hibsda payti rivojlanganini aytdi.
Saakashvilining fikricha, uning o‘limi Kreml rejimining g‘alabasi bo‘ladi.
“Mening o‘limim Gruziyada siyosiy betartiblikni keltirib chiqarishi mumkin, ammo qiynoqda o‘lishim shubhasiz Putinning g‘alabasi sifatida ko‘riladi — bu mintaqadagi va, ehtimol, dunyoning Rossiya imperializmiga qarshi tura olmaydigan barcha yetakchilar uchun qudratli ramzga aylanadi”, — dedi Saakashvili.
Saakashvilini Gruziyada hibsga olish va qiynoqlar
2021-yil 1-oktabrda Saakashvili sakkiz yil ichida birinchi marta munitsipal saylovlar arafasida Gruziyaga qaytganida hibsga olingan. U bir qancha jinoiy ishlarda, xususan, 2005-yilda gruziyalik sobiq deputat Valeriy Gelashviliga hujum uyushtirganlikda ayblanmoqda. Buning uchun u allaqachon sirtdan olti yillik qamoq jazosiga hukm qilingan.
Hibsga olingandan so‘ng Saakashvili darhol ochlik e’lon qilgan va u 2021-yil 19-noyabrda ochlikni to‘xtatishga rozi bo‘lgan. 29-noyabr kuni Saakashvili hibsga olinganidan keyin birinchi marta sudga olib borilgan va hibsda qiynoqqa solinganini aytgan. U o‘ziga qo‘yilgan ayblovlarni siyosiy ta’qib, o‘zini esa siyosiy mahbus deb biladi.
Uzoq davom etgan ochlik e’lonidan so‘ng siyosatchining ahvoli og‘irlashgan, shu sababli u Rustav qamoqxonasidan Goridagi harbiy gospitalga o‘tkazilgan.
2022-yil dekabrida Ukraina Tashqi ishlar vazirligi o‘sha paytda Tbilisidagi Vivamedi tibbiyot markazida bo‘lgan Saakashvilining sog‘lig‘i sezilarli darajada yomonlashganidan chuqur xavotirda ekanini bildirgan.
2023-yilning 1-fevralida Ukraina prezidenti Vladimir Zelenskiy Gruziya hukumati Saakashvilini “omma oldida qiynoqqa solib, o‘ldirayotganini” aytdi. Saakashvilining o‘zi esa Ukrainadagi urush g‘alabasigacha yashay olmasa, yuragini Kiyevga dafn etishga chaqirdi.
Izoh (0)