Yevropa ittifoqi Rossiyaga qurol-yarog‘ yetkazib berilishi haqidagi maʼlumotni olgani munosabati bilan Xitoyga qarshi sanksiyalar joriy qilmoqchi. Bu haqda Frankfurter Allgemeine Zeitung ma’lum qildi.
Manbalarga ko‘ra, 1-dekabr kuni lavozimini tark etadigan YI diplomatiyasi rahbari Josep Borrel 18-noyabrga belgilangan tashqi ishlar vazirlarining yig‘ilishidan oldin tegishli razvedka ma’lumotlari haqida Yevropa ittifoqi davlatlarini xabardor qilgan.
U taqdim etilgan dalillarni “ishonchli” deb atadi. Dalillarga ko‘ra, Rossiyaga Ukrainadagi janglarda foydalanish uchun Xitoy tomonidan qurollar yetkazib berilgan. Borrel buning uchun Xitoyni jazolashni talab qildi.
Uning so‘zlariga ko‘ra, Xitoy firmalari bilan operatsiyalarni to‘xtatish, aktivlarni muzlatish va YI mamlakatlariga kirishni taqiqlashga olib keladigan sanksiyalar ro‘yxatini yaratish zarur.
Nashr manbalaridan biri ta’kidlaganidek, endi ko‘p narsa Xitoyning unga qo‘yilgan ayblovlarga qanday munosabatda bo‘lishiga bog‘liq. Sanksiyalar haqidagi munozaralar esa hali dastlabki bosqichda.
Xitoyning Vashingtondagi elchixonasi matbuot kotibi Lyu Pengyu avvalroq AQSH “Xitoy Rossiyaga harbiy yordam berayotgani haqida dezinformatsiya tarqatayotganini” aytgan edi. Uning so‘zlariga ko‘ra, Pekin Ukrainadagi “mojaro ishtirokchilaridan birortasiga hech qachon qurol yetkazib bermagan”.
Borrelning yana bir taklifi
Avvalroq Yevropa diplomatiyasi rahbari Josep Borrel Yevropa ittifoqiga a’zo davlatlarga Isroil bilan muntazam siyosiy muloqotni to‘xtatishni taklif qildi.
Hozircha Yevropa ittifoqi bosh diplomatining og‘zaki tashabbusi 18-noyabr kuni YIga a’zo davlatlar tashqi ishlar vazirlarining bo‘lajak uchrashuvida muhokama qilinadi. Isroil bilan siyosiy muloqot 2000-yilda tuzilgan Assotsiatsiya to‘g‘risidagi bitim bilan tartibga solinadi. U tomonlar o‘rtasidagi munosabatlar inson huquqlari va demokratiya tamoyillariga hurmat ko‘rsatishga asoslanganini ham nazarda tutadi.
Izoh (0)