18-noyabr kuni bo‘lib o‘tadigan yig‘ilishda Yevropa ittifoqi tashqi ishlar vazirlari Ukrainaning G‘arb qurollari bilan Rossiyaga zarba berishiga qo‘yilgan taqiqni olib tashlanishini muhokama qiladi. Bu haqida Yevropa diplomatiyasi rahbari Josep Borrel xabar berdi.
Borrelning so‘zlariga ko‘ra, u hamisha Rossiya hududiga zarba yo‘llash uchun Ukrainaga ruxsat berish tarafdori bo‘lgan. Borrel Yevropa ittifoqiga a’zo davlatlar bu qarorni qo‘llab-quvvatlashiga umid bildirdi.
“Men Ukraina biz bergan qurollardan nafaqat o‘qlarni qaytarish, balki kamonchilarni yo‘q qilish uchun ham foydalanishi kerakligini bir necha bor ta’kidlaganman”, dedi Borrel Bryusselda tashqi ishlar vazirlari bilan uchrashuvdan oldin.
U Yevropa ittifoqi davlatlari ham shunday qarorga kelishi kerakligiga ishonch bildirdi. “Umid qilamanki, a'zo davlatlar bunga rozi bo'lishadi”, dedi diplomat.
Bir kun avval The New York Times o‘z manbalariga tayanib, AQSh prezidenti Jo Bayden Ukrainaga Amerikaning uzoq masofali ATACMS raketalarini Rossiya hududiga, xususan, Kursk viloyatiga otishiga ruxsat bergani haqida xabar qilgandi.
Keyinroq Fransiyaning Le Figaro nashri Ukraina Qurolli kuchlariga qo‘yilgan cheklovlarni olib tashlash tarafdori bo‘lgan Fransiya va Buyuk Britaniya Rossiya hududida SCALP va Storm Shadow raketalari bilan zarba yo‘llashga ruxsat berganini yozdi. 18-noyabr kuni ertalab gazeta ushbu xabarni o‘z saytidan o'chirib tashladi.
Axios ma’lumotlariga ko‘ra, AQSh o‘tgan hafta oxirida Ukrainani cheklovlar bekor qilingani haqida xabardor qilgan. Rossiya prezidenti Vladimir Putinning taʼkidlashicha, G‘arbning uzoq masofaga mo‘ljallangan qurollari bilan Rossiya hududiga zarba berish taqiqini bekor qilish NATO davlatlarining harbiy mojaroga bevosita aralashuvini anglatadi va urushning mohiyatini “sezilarli darajada o‘zgartiradi”.
Izoh (0)