Европа иттифоқи Грузия ҳукуматига ажратилган 121 миллион еврони қайтариб олди.
“Европа иттифоқи бу маблағларни бошқа мақсадларга йўналтиришни режалаштирмоқда”, деди Европа иттифоқи дипломатияси раҳбари Жосеп Боррель.
Унинг сўзларига кўра, маблағлар “фуқаролик жамияти ва тўғридан-тўғри грузин халқига фойда келтирадиган дастурлар” учун ишлатилади.
Октябрь ойида Грузияда бўлиб ўтган парламент сайловлари мамлакатнинг “ҳозирги ҳукумат давридаги демократик чекинишини” тасдиқлаганига муносабат билдирган ҳолда, ЕИ Грузия қуролли кучларини Европа тинчлик жамғармаси орқали қўллаб-қувватлашни, шунингдек, Грузияга тўғридан-тўғри 121 миллион евро ажратишни бекор қилди.
Сайловдаги ҳодисаларни диққат билан ўрганиш учун Брюссел Грузияга сиёсий миссия юборишни режалаштирмоқда. Сайловлар бузилишига ўз баҳосини тақдим этиш учун эса Демократик институтлар ва инсон ҳуқуқлари бўйича бюронинг Грузиядаги сайловни кузатиш миссияси раҳбари таклиф этилади.
“Грузия орзуси” етакчилари грузин халқининг орзу-умидларига қарши чиқиб, мамлакатни Европа иттифоқи йўлидан узоқлаштирди. Биз ҳаммамиз Грузияни Европа йўлига қайтаришни хоҳлаймиз”, дея таъкидлади Боррель.
У Европа иттифоқининг эшиги Грузия учун очиқ қолишини қўшимча қилди.
Грузиядаги парламент сайловларидан кўп ўтмай, Европа иттифоқи дипломатияси раҳбари халқаро кузатувчилар сайлов кампанияси пайтида ҳам, овоз бериш куни ҳам қонунбузарликларни қайд этиб, “сайловларни эркин ва адолатли ўтганини тан олмаганини” айтди. Улар, хусусан, сайловчиларни қўрқитиш ва пора олиш, давлат хизматчиларига босим ўтказиш, бир неча марта овоз бериш ва бюллетенларни қўйиб юбориш ҳолатлари ҳақида гапирган.
Қўшма Штатлар ва ЕИ давлатлари Грузиядаги эҳтимолий фирибгарлик ва сайлов жараёнига даъво қилинган аралашувни тергов қилишга чақирган.
Расмий маълумотларга кўра, 26 октябрь куни бўлиб ўтган сайловларда ҳукмрон “Грузия орзуси” партияси 53,93 фоиз овоз тўплаб, парламентдаги 150 ўриндан 89 тасини қўлга киритган эди. Шу билан бирга, “Грузия орзуси” барча йирик шаҳарларда, жумладан, Тбилисида, шунингдек, хориждаги сайлов участкаларида мухолифат устидан ғалаба қозонган.
Парламентга кирган тўрт мухолифат гуруҳи сайловлар сохталаштирилганини даъво қилиб, овоз бериш натижаларини тан олмаган. Улар Грузия судлари ва прокурорлари мустақил эмаслигини ва ҳокимиятга бўйсунишини таъкидлаб, халқаро тергов ўтказилишини талаб қилмоқда. Грузия президенти Саломе Зурабишвили ҳам “Грузия орзуси” сайловларни сохталаштирганини айтиб, янги сайловлар ўтказишга чақирган.
Президент 18 ноябрь куни мамлакат аҳолисига қилган махсус мурожаатномасида 26 октябрдаги сайловда яширин ва умумий овоз бериш тамойиллари бузилганини таъкидлаган. У парламент сайловлари натижалари юзасидан Конституциявий судга шикоят қилишини билдирган.
Зурабишвилининг таъкидлашича, ўтган сайловлар мамлакат аҳолисининг аксарияти томонидан тан олинмаган.
“Нодавлат нотижорат ташкилотлари ва кузатувчи ташкилотлар бу сайловларни тан олмайди. Улар мамлакат ичида ҳам, ташқарисида ҳам сайловлар эркин ва адолатли ўтганини даъво қилишдан ўзини тияди. Орадан уч ҳафта ўтди, бизнинг асосий демократик ҳамкорларимиздан бирортаси бу сайловларни тан олмади”, деди Грузия етакчиси.
Изоҳ (0)