So‘nggi haftada Ukrainadagi 5 ta aholi punkti Rossiya armiyasi nazoratiga o‘tdi: biri Xarkov viloyatida va to‘rttasi Donetsk viloyatida. Bu haqda Rossiya Mudofaa vazirligi bayonot berdi.
Bayonotda aytilishicha, markaz qo‘shinlari guruhining bo‘linmalari “Ukraina mudofaasi ichkarisiga yurishda davom etgan” va Donetsk viloyatidagi Voznesenka, Volchenka va Stepanovka aholi punktlarini nazoratga olgan.
Vostok qo‘shinlari guruhi bo‘linmalari ishtirokida xuddi shu hududda Rovnopol qishlog‘i nazorat ostiga olingan.
“Shu bilan birga, G‘arbiy qo‘shinlar guruhi bo‘linmalarining muvofiqlashtirilgan harakatlari natijasida Xarkov viloyatidagi Kolesnikovka aholi punkti Rossiya nazoratiga o‘tdi”, deya qo‘shimcha qilgan Mudofaa vazirligi.
Xabarda, shuningdek, “Rossiya Qurolli kuchlari 9—15-noyabr kunlari yuqori aniqlikdagi qurollar va dronlar yordamida 42 ta guruhli zarbalar bergani, buning natijasida Ukraina harbiy-sanoat majmuasi korxonalarini ta’minlash uchun foydalaniladigan energetika obyektlari, harbiy aerodromlar infratuzilmasi, Sapsan operativ-taktik raketalarining tarkibiy qismlarini ishlab chiqarish ustaxonasi, dronlar va ularning tarkibiy qismlarini, shuningdek, o‘q-dori omborlari, portlovchi moddalar hamda yoqilg‘ilarni yig‘ish va saqlash joylari zarar ko‘rgan.
Rus OAV avvalroq Rossiya harbiylari Kupyansk yo‘nalishida ilgarilab, Ukraina armiyasining dastlabki tayanch nuqtasini egallab olgani haqida xabar bergan edi.
Birinchi bo‘linmalar 13-noyabr kuni kechqurun aholi maskanining sharqiy qismiga kirib borgan. Gap Oskol ko‘lining chap qirg‘og‘ida joylashgan Zaoskolye tumani haqida bormoqda.
Biroq ma’lumotlarga ko‘ra, ruslarning Kupyanskning chap qirg‘og‘ini to‘liq nazorat qilayotgani haqida gapirishga hali erta.
Qarshi tomon nima deydi?
Ukraina Qurolli Kuchlari Bosh shtabi matbuot kotibi kapitan Andrey Kovalyovning mahalliy matbuotga aytishicha, Rossiya kuchlari Kupyansk mudofaasini buzib o‘ta olmagan. Shahar Ukraina gornizoni nazoratida qolmoqda.
“Bu sektorda rus armiyasining barcha hujumlari muvaffaqiyatli qaytarildi. Rossiyaliklar Kupyanskka kira olmadi. Shahar Ukraina Qurolli kuchlari nazorati ostida qolmoqda”, dedi u.
Kovalyovning qo‘shimcha qilishicha, Rossiya kuchlari 13-noyabr kuni 15 ga yaqin harbiy texnika, jumladan, tanklar, piyoda jangovar mashinalar va mina tozalash mashinasi bilan hujumga o‘tgan. Biroq Ukraina mudofaachilari ularni muvaffaqiyatli qaytargan.
Izoh (0)