Janubiy Koreya razvedkasi maʼlumotlariga ko‘ra, 12 mingga yaqin Shimoliy Koreya askari Ukrainadagi urushda qatnashish uchun Rossiyaning sharqiy hududlarida tayyorgarlikdan o‘tmoqda. Bu haqda Yonhap agentligi Janubiy Koreya razvedkasiga tayanib xabar berdi.
Qayd etilishicha, KXDR texnik xodimlari hozirdanoq rossiyalik harbiy xizmatchilarga raketa uchiruvchi qurilmalarga xizmat ko‘rsatishda yordam bermoqda.
Avvalroq Ukraina Mudofaa vazirligi Shimoliy Koreya askarlari 1-noyabrdanoq jangovar harakatlarda qatnashishga tayyor bo‘lishini ma’lum qilgandi. Vazirlik vakiliga ko‘ra, KXDR piyoda qo‘shinlari Rossiya texnika va o‘q-dorilaridan foydalanadi.
2600 nafar askardan iborat birinchi bo‘linma Kursk viloyatiga yuborilishi kutilmoqda. Shimoliy Koreya qo‘shinlarining qolgan qismi qayerga ketishi noma’lum.
Avvalroq Ukraina prezidenti Vladimir Zelenskiy Bryusseldagi matbuot anjumanida KXDR Ukrainaga qarshi urushda qatnashish uchun harbiylarning turli bo‘linmalaridan jami 10 ming nafar askarini yuborishni rejalashtirayotganini ma’lum qilgan.
Janubiy Koreya prezidenti Yun Suk Yol asosiy razvedka, harbiy va milliy xavfsizlik vakillari ishtirokida Shimoliy Koreya qo‘shinlarining urushdagi ishtirokini muhokama qilish uchun favqulodda xavfsizlik yig‘ilishi o‘tkazgan. Prezident idorasi bayonotida aytilishicha, Shimoliy Koreyaning Rossiyaga qo‘shin yuborishi nafaqat Janubiy Koreya, balki butun xalqaro hamjamiyat uchun jiddiy xavfsizlikka tahdid soladi va Seul “bu harakatga barcha mavjud vositalar bilan javob beradi”.
Oktyabr oyi boshida Ukraina Milliy xavfsizlik va mudofaa kengashining dezinformatsiyaga qarshi kurash markazi Donetsk viloyatidagi KXDR harbiylari Rossiyaga o‘tkazilgan o‘q-dorilar holatini kuzatayotganini ma’lum qilgandi.
Izoh (0)