Ukrainaning yosh aholisi mamlakatni tark etmoqda, deya BMT Aholishunoslik jamg‘armasining Sharqiy Yevropa va Markaziy Osiyo bo‘yicha direktori Florens Bauer xabar berdi.
Uning so‘zlariga ko‘ra, 2022-yil 24-fevraldan beri Ukrainani 10 millionga yaqin aholi tark etgan.
“Rossiya bilan urushning bevosita qurbonlarini hisobga olmaganda, bu odamlarning katta qismi mamlakatni tark etdi. Aholi qarib bormoqda, yoshlar esa boshqa joylardan imkoniyatlar izlab, mamlakatni tark etmoqda”, dedi Bauer brifingda.
Jamg‘arma ma’lumotlariga ko‘ra, Ukrainada tug‘ilish darajasi Rossiya bilan mojarodan oldin ham past bo‘lgan, ammo hozir bu dunyodagi eng past ko‘rsatkichlardan biri - har bir ayolga taxminan 1 nafardan bola to‘g‘ri keladi.
Avgust oyida Ukraina prezidenti Vladimir Zelenskiy aholining chiqib ketishi bilan bog‘liq muammoni mavjudligini aytib, mamlakatni tark etgan tinch aholi bilan ishlash bo‘yicha vazirlik tashkil etilishini e’lon qilgan edi. Shuningdek, u yoshlarning chetga chiqib ketishi asosiy muammo bo‘lib qolayotganini aytgan.
Shu bilan birga, Ukraina rasmiylari hali safarbarlik yoshini 18 yoshga tushirish niyatida emasligini ta’kidlagan. Ukraina Mudofaa vazirligi rahbari Rustem Umerovga ko‘ra, AQSH Ukraina bilan mazkur masalani muhokama qilmoqda.
Izoh (0)