Ukrainadagi Rossiya armiyasining shimoliy jangovar qismlari 18-may kuni Xarkov viloyatining Staritsa hududini egallagan. Bu haqda Rossiya Mudofaa vazirligi bayonotiga asoslanib, “TASS” nashri xabar berdi.
Manbada aytilishicha, Ukraina kuchlari Staritsa yo‘nalishida ortga chekingan. Shaharcha atrofidagi muhim strategik nuqtalarga rus qurolli qismlari joylashgan.
“Shimoldagi jangovar guruh bo‘linmalari faol operatsiyalarni amalga oshirib, Xarkov viloyatidagi Staritsa aholi punktini ozod qildi. Dushman mudofaasiga chuqurroq kirib borildi”, — deyiladi Rossiya Mudofaa vazirligi xabarida.
Mudofaa vazirligi juma va shanba kunlari Rossiya havo hujumidan mudofaa tizimi 37 ta Ukraina droni, 1 ta “Tochka-U” raketasi, 21 ta HIMARS raketasi, shuningdek, Vampire rusumidagi raketalarni urib tushirganini xabar qilgan.
Mudofaa vazirligi, shuningdek, o‘tgan kun davomida 134 ta hududda Ukraina qo‘shinlari va harbiy texnikasiga shikast yetkazilganini aytgan. Hujumlarda 270 nafargacha Ukraina askari halok bo‘lgani maʼlum qilingan.
“G‘arbiy jangovar guruh bo‘linmalari yanada qulayroq pozitsiyalarga o‘tdi va Ukraina qurolli kuchlarining 14-mexanizatsiyalashtirilgan brigadasi va 110-hududiy mudofaa brigadasi yaqinidagi kuchlarni mag‘lubiyatga uchratdi. Xarkov viloyatidagi Sinkovka va Ivanovka hamda Lugansk Xalq Respublikasining Artyomovka shaharlari, shuningdek, Chervonaya Dibrova yaqinida Ukraina qurolli kuchlarining 63-mexanizatsiyalashgan brigadasi hujumchi guruhining hujumi qaytarildi”, — deyiladi Rossiya Mudofaa vazirligi xabarida.
Ukraina rasmiylari Xarkov viloyatidan evakuatsiya qilingan fuqarolar soni 10 ming nafarga yetganini bildirgan. Viloyat shimoli va shimoli-sharqida ruslar bilan faol janglar ketayotgani xabar qilingan.
Izoh (0)