Qo‘shma Shtatlar Rossiyada joylashgan Shimoliy Koreya qo‘shinlarini doimiy joylashuv hududlariga qaytarishda Xitoydan ikki davlatga bosim o‘tkazishni so‘radi.
“Vashington Xitoy hukumatidan aloqalarni davom ettirayotgan Shimoliy Koreya rahbariyatiga bosim o‘tkazishni so‘radi”, deb xabar berdi CNN nomi oshkor etilmagan amerikalik rasmiylarga tayanib.
Rasmiylarning biriga ko‘ra, AQSH prezidentining milliy xavfsizlik bo‘yicha maslahatchisi Jeyk Sallivan ham Shimoliy Koreya qo‘shinlarining Rossiyaga yuborilishi yuzasidan boshqa bir qator davlatlarni Pekin bilan bog‘lanishga ko‘ndirish haqida ko‘rsatma bergan. Biroq CNN suhbatdoshlari G‘arb rasmiylari bu masala bo‘yicha Xitoy Shimoliy Koreyaning rejalariga xalaqit berishiga ishonmasligini aytgan.
Avvalroq Pentagon bir necha ming shimoliy koreyalik askarlar Kursk viloyati tomon harakatlangani va ularning bir qismi allaqachon bu hududda bo‘lganini ma’lum qilgan edi.
“Biz Rossiya bu askarlardan jangovar harakatlarda yoki Kurskdagi Ukraina kuchlariga qarshi jangovar operatsiyalarni qo‘llab-quvvatlash maqsadida foydalanish niyatida ekanligidan xavotirdamiz”, deydi AQSH Mudofaa vazirligi matbuot kotibi Patrik Rayder.
Pentagon joylashtirilgan kuchlar sonini 10 ming nafar ekanini taxmin qilgan.
Shuningdek, NATO bosh kotibi Mark Ryutte Shimoliy Koreya qo‘shinlari Rossiyaga, shuningdek, ularning alohida bo‘linmalari Kursk viloyatiga o‘tkazilishini eʼlon qilgan edi. Shimoliy Atlantika alyansi vaziyat rivojini diqqat bilan kuzatib borishi hamda alyans doirasida Ukraina va Hind-Tinch okeani mintaqasidagi hamkorlar bilan bu masalada faol maslahatlashayotganini ma’lum qilgan.
Izoh (0)