Vladimir Putin Rossiya Xarkov shahriga hujum qilish niyatida emasligini aytdi.
Uning so‘zlariga ko‘ra, Xarkov chegarasidagi operatsiya bufer zona yaratish va Rossiya hududlarini Ukraina Qurolli kuchlari tomonidan o‘qqa tutilishidan himoya qilish uchun zarur.
“Bu ularning ham aybi, chunki ular o‘qqa tutdi va, afsuski, chegara hududlaridagi turar joylarni, shu jumladan, Belgorodni o‘qqa tutishda davom etmoqdalar. U yerda tinch aholi o‘lmoqda. Hammasi ochiq-oydin ko‘rinib turibdi-ku. Ular to‘g‘ridan to‘g‘ri shahar markazini, turar joylarni o‘qqa tutmoqda. Va agar shunday davom etsa, biz xavfsizlik zonasi, sanitariya zonasi yaratishga majbur bo‘lamiz, deb ochiq aytdim. Biz shunday qilyapmiz”, — deya tushuntirdi Vladimir Putin.
Prezident Rossiya qo‘shinlari Xarkov yo‘nalishida qat’iy reja bo‘yicha harakatlanayotganini ta’kidladi. Shu bilan birga, “bugungi kunda G‘arb matbuoti faol yozayotgan Xarkovni olish rejalari yo‘qligi”ni ham qo‘shimcha qildi.
11-may kuni Rossiya Mudofaa vazirligi Xarkov viloyatidagi bir qancha qishloqlar o‘z nazoratiga o‘tganini ma’lum qilgandi. Ertasi kuni Rossiya hujumini Ukraina prezidenti Vladimir Zelenskiy tasdiqladi. Reuters manbalarining aytishicha, Rossiya Xarkov viloyatida 10 km bufer zona yaratmoqchi.
Oxirgi marta Belgorodning jiddiy o‘qqa tutilishi 12-may kuni sodir bo‘lgan. Rossiya Mudofaa vazirligi tarqatgan xabarga ko‘ra, shahar uzra urib tushirilgan Ukraina raketasining parchasi Shorsa ko‘chasidagi 55a-uyning podyezdiga kelib tushgan. Oqibatda o‘n qavatning hammasi qulab tushdi. 17 kishi halok bo‘ldi.
Izoh (0)