Xarkov yaqinida hujum uyushtirgan rus qo‘shinlari bir hafta ichida Ukraina hududining 278 kvadrat kilometrini egallab oldi. Bu haqda Amerika urushni o‘rganish instituti (ISW) ma’lum qildi.
Qayd etilishicha, Xarkov yaqinida 9-maydan 15-maygacha bo‘lgan davrdagi hujum paytida Ukraina o‘z hududining 257 kvadrat kilometrini boy bergan. Rossiya qo‘shinlari frontning boshqa tarmoqlarida, xususan, Ukraina janubidagi Rabotino qishlog‘i hisobidan yana 21 kvadrat kilometrni egallab olgan.
Rossiya—Ukraina urushi boshlanganidan beri, ISW ma’lumotlariga ko‘ra, Rossiya Ukraina hududining jami 12 foizini (65,3 ming kvadrat kilometr) egallab olgan. 2014-yilda anneksiya qilingan Qrim ushbu hisob-kitoblarda hisobga olinmagan.
Rossiyaning Xarkov viloyatiga hujumi
Rossiya armiyasi 10-may kuni ertalab Xarkov viloyatiga hujum boshlagan edi. 16-mayga qadar Rossiya Qurolli kuchlari mintaqadagi o‘nga yaqin aholi punktlarini bosib olishga muvaffaq bo‘lgan. Ular orasida Pletenevka va Gatishe, Borisovka, Ogurtsovo, Pilnaya hamda Strelechya bor.
16-may kuni Rossiya Mudofaa vazirligi Shimoliy kuchlar guruhi bo‘linmalari dushman mudofaasiga kirib kelgani, Kraken va xorijiy legion tuzilmalari, 125-mudofaa brigadasining ishchi kuchi va texnikasi, Xarkov viloyatining Dergachi, Liptsi va Volchansk aholi punktlari hududlarida 15-chegara otryadi kuchlarini mag‘lubiyatga uchratgani haqida xabar berdi.
Izoh (0)