Rossiya 2023-yilda “hal qiluvchi strategik harakat”larni amalga oshirish uchun bir nechta ssenariylariga tayanishi mumkin. Urushni o‘rganish instituti (ISW) tahlilchilari bu bo‘yicha ma’lumot berdi.
Tahlilchilarga ko‘ra, Rossiya urushni cho‘zish g‘oyasidan voz kechmaydi.
“Kremlning 2023-yildagi strategik harakatlarga tayyorgarlik ko‘rish rejasi uzoq davom etadigan urush sharoitini yaratishni istisno etmaydi. ISW Rossiyaning Ukrainadagi urushda g‘alaba qozonish uchun ‘so‘nggi urinishini’ bashorat qilmaydi. Urush tugamaydi”,— deydi ekspertlar.
Birinchi ssenariyga ko‘ra, 2023-yilda rus qo‘shinlari Lugansk viloyatida yirik hujum uyushtirishga harakat qilishi mumkin. Hozirda Putin rejimi Donetsk va Lugansk viloyatlarini to‘liq bosib olishni Kremlning harbiy maqsadi deb atamoqda. Donetsk va Lugansk viloyatlari logistik jihatdan eng oson bosib olinadigan hududlar ekani inobatga olinsa, bu Rossiyaning erisha oladigan maqsadlaridan biridir.
Shu bilan birga, ISW tahlilchilari Rossiya armiyasi Ukraina janubida Xerson yoki Zaporojye viloyatlariga hujum boshlashi dargumon deb hisoblaydi.
Ikkinchi ssenariyga ko‘ra, Rossiya Ukrainaning qarshi hujumini yengish uchun mudofaa operatsiyasini tayyorlaydi. Ukraina qurolli kuchlari 2023-yilda qarshi hujumga o‘tishni rejalashtirayotgan ekan, Rossiya Xarkov viloyatidagi mag‘lubiyat yoki Xersonni yo‘qotish kabi yana bir muhim mag‘lubiyatdan qochishga intilmoqda.
Shu maqsadda 2022-yil oxirida janubiy Xerson yo‘nalishidan Lugansk viloyatiga muhim harbiy qismlarni qayta joylashtirilgan, Lugansk viloyati, Rossiyaning Belgorod va Kursk viloyatlarida dala istehkomlarini yaratilgan.
ISW tahlilchilari rus armiyasi Ukrainaning qarshi hujumini muvaffaqiyatli mag‘lub etish va ukrain harbiylarining muhim qismini yo‘q qilish orqali Ukrainani urushda g‘olib bo‘lish tashabbusidan mahrum qilishni xohlashini aytmoqda.
Rossiya armiyasi muvaffaqiyatga erishsa, “tartibsiz va zaiflashgan Ukraina kuchlaridan foydalanish uchun qarshi hujumni rivojlantirishi mumkin”.
“Rossiya qo‘shinlari umumiy hujum operatsiyasini o‘tkazmasdan turib, yirik hujum operatsiyasiga yoki tashkillashtirilmagan hujumlarni boshlashi mumkin”, — deya xulosa qilgan tahlilchilar.
Mavzuga doir: