Qo‘shma Shtatlar Ukrainaning 1,5 million aholiga ega Xarkov shahriga qaratilgan Rossiya hujumidan himoya qilish, Ukraina armiyasini qurol-yarog‘ bilan ta’minlash uchun kecha-yu kunduz ishlamoqda. Bu haqda Oq uy vakiliga tayanib, Deutsche Welle xabar berdi.
Ruslar Xarkovga kattaroq hujumga tayyorlanayotgan bo‘lishi mumkin, — dedi Oq uy Milliy xavfsizlik kengashining strategik aloqalar bo‘yicha koordinatori Jon Kirbi.
Uning so‘zlariga ko‘ra, Rossiya Xarkov yo‘nalishida uzoq masofaga o‘q uzishga tayyorlanayotgani haqida xavotirli alomatlar bor.
Shu kuni Ukraina Mudofaa vazirligi Rossiya armiyasining Xarkov viloyati chegarasida harakatlari faollashgani haqida bayonot bergan edi. Mudofaa vazirligi frontning ushbu sektorida mudofaani kuchaytirish uchun zaxira bo‘linmalari yuborilganini ma’lum qilgan.
Volchansk yo‘nalishida 24 soat davomida dushman boshqariladigan havo bombalari (KAB) yordamida havo hujumlarini amalga oshirdi. Tunda rus bosqinchilari artilleriya ko‘magida mudofaamizning oldingi chizig‘iga o‘t ochishni kuchaytirdi. Taxminan ertalab soat 5 da zirhli texnikalar yordamida mudofaa chizig‘ini yorib o‘tishga urinish sodir bo‘ldi, — deyiladi Ukraina armiyasi bayonotida.
Rossiya harbiy Telegram kanallari xabariga ko‘ra, Rossiya armiyasi Rossiya bilan chegaradosh Xarkov tomon yura boshlagan. Xususan, Goptovka, Krasnoye, Pilnaya, Strelechya, Volchansk va Borisovka chegaradosh aholi punktlarini ommaviy o‘qqa tutgan.
Urushni o‘rganish instituti (ISW) fikricha, Rossiya bunday harakatlari bilan Xarkov aholisini shaharga ehtimoliy hujumdan qo‘rqib qochishga majburlamoqchi.
Izoh (0)