Ukraina prezidenti ofisi rahbari Andrey Yermak o‘zining Telegram kanalida Rossiyaning Ukraina energetika infratuzilmasiga qilingan hujumlar javobsiz qolmasligini aytib tahdid qildi.
“Energetika sektorimizni yo‘q qilish istagi ruslar va ularning infratuzilmasi uchun juda qimmatga tushadi”, dedi Yermak.
U, shuningdek, hamkorlarni G‘arb qurollaridan foydalanib Rossiya hududiga o‘q otishga ruxsat berishga chaqirgan.
26-avgust kuni ertalab butun Ukraina bo‘ylab havo hujumi haqida ogohlantirish e’lon qilingan edi. Portlashlar Kiyev, Lutsk, Krivoy Rog, Xarkov, Zaporojye, Kremenchug, Kropivitskiy, Vinnitsa, Dnepr, Xmelnitskiy, Ivano-Frankivsk viloyati va Lvovda sodir bo‘lgan. Ukraina bosh vaziri Denis Shmigalning so‘zlariga ko‘ra, Ukrainaning 15 ta viloyatidagi energetika infratuzilmasi obyektlari zarar ko‘rgan.
Shu fonda “Ukrenergo” kompaniyasi tizimni barqarorlashtirish uchun elektr energiyasini favqulodda uzilishlar jadvallarini joriy qilgan. Elektr uzilishlari sababli Ukraina ichidagi poyezdlar harakati va suv ta’minoti muammolarga duch kelgan.
Rossiya Mudofaa vazirligi rossiyalik harbiylar Ukrainadagi energetika obyektlariga yirik zarbalar berganini tasdiqlagan.
Shuningdek, 26-avgustga o‘tar kechasi Rossiyaning bir qator hududlari Ukraina dronlari tomonidan hujumga uchragan. Mudofaa vazirligi maʼlumotlariga ko‘ra, ulardan to‘qqiztasi Saratov viloyatida urib tushirilgan. U yerda dronlar Saratov va Engelsdagi turar joy binolariga urilgan, to‘rt kishi jarohatlangan.
Izoh (0)