Сўнгги ҳафтада Украинадаги 5 та аҳоли пункти Россия армияси назоратига ўтди: бири Харьков вилоятида ва тўрттаси Донецк вилоятида. Бу ҳақда Россия Мудофаа вазирлиги баёнот берди.
Баёнотда айтилишича, марказ қўшинлари гуруҳининг бўлинмалари “Украина мудофааси ичкарисига юришда давом этган” ва Донецк вилоятидаги Вознесенка, Волченка ва Степановка аҳоли пунктларини назоратга олган.
Восток қўшинлари гуруҳи бўлинмалари иштирокида худди шу ҳудудда Ровнопол қишлоғи назорат остига олинган.
“Шу билан бирга, Ғарбий қўшинлар гуруҳи бўлинмаларининг мувофиқлаштирилган ҳаракатлари натижасида Харьков вилоятидаги Колесниковка аҳоли пункти Россия назоратига ўтди”, дея қўшимча қилган Мудофаа вазирлиги.
Хабарда, шунингдек, “Россия Қуролли кучлари 9—15 ноябрь кунлари юқори аниқликдаги қуроллар ва дронлар ёрдамида 42 та гуруҳли зарбалар бергани, бунинг натижасида Украина ҳарбий-саноат мажмуаси корхоналарини таъминлаш учун фойдаланиладиган энергетика объектлари, ҳарбий аэродромлар инфратузилмаси, Сапсан оператив-тактик ракеталарининг таркибий қисмларини ишлаб чиқариш устахонаси, дронлар ва уларнинг таркибий қисмларини, шунингдек, ўқ-дори омборлари, портловчи моддалар ҳамда ёқилғиларни йиғиш ва сақлаш жойлари зарар кўрган.
Рус ОАВ аввалроқ Россия ҳарбийлари Купянск йўналишида илгарилаб, Украина армиясининг дастлабки таянч нуқтасини эгаллаб олгани ҳақида хабар берган эди.
Биринчи бўлинмалар 13 ноябрь куни кечқурун аҳоли масканининг шарқий қисмига кириб борган. Гап Оскол кўлининг чап қирғоғида жойлашган Заосколье тумани ҳақида бормоқда.
Бироқ маълумотларга кўра, русларнинг Купянскнинг чап қирғоғини тўлиқ назорат қилаётгани ҳақида гапиришга ҳали эрта.
Қарши томон нима дейди?
Украина Қуролли Кучлари Бош штаби матбуот котиби капитан Андрей Ковалёвнинг маҳаллий матбуотга айтишича, Россия кучлари Купянск мудофаасини бузиб ўта олмаган. Шаҳар Украина горнизони назоратида қолмоқда.
“Бу секторда рус армиясининг барча ҳужумлари муваффақиятли қайтарилди. Россияликлар Купянскка кира олмади. Шаҳар Украина Қуролли кучлари назорати остида қолмоқда”, деди у.
Ковалёвнинг қўшимча қилишича, Россия кучлари 13 ноябрь куни 15 га яқин ҳарбий техника, жумладан, танклар, пиёда жанговар машиналар ва мина тозалаш машинаси билан ҳужумга ўтган. Бироқ Украина мудофаачилари уларни муваффақиятли қайтарган.
Изоҳ (0)