8-yanvarga o‘tar kechasi Rossiya qo‘shinlari Xarkov viloyatining Merefa shahriga raketa hujumi uyushtirdi, deb xabar qildi viloyat harbiy boshqarmasi boshlig‘i Oleg Sinegubov.
Uning so‘zlariga ko‘ra, otishma oqibatida 50 yoshli erkak halok bo‘lgan. “Hatto Rojdestvoda ham dushman tinch aholi terrorini to‘xtatmayapti!” — deb yozdi Sinegubov Telegram kanalida.
Bundan tashqari, Zaporojye shahar kengashi kotibi Anatoliy Kurtevning ma’lum qilishicha, avvalroq e’lon qilingan o‘t ochishni to‘xtatish rejimiga qaramay, yakshanbaga o‘tar kechasi Rossiya armiyasi Zaporojye chekkasida o‘q uzgan. U yetkazilgan zarar va qurbonlar haqida ma’lumot bermadi.
Zaporojye viloyati harbiy boshqarmasi rahbari Aleksandr Starux ham 7-yanvar kuni ertalab rossiyaliklar BMTning viloyatdagi Orexov shahriga gumanitar yordam olib kelgan missiyasini o‘qqa tutganini aytdi.
Donetsk viloyati harbiy ma’muriyati rahbari Pavel Kirilenkoning yozishicha, tunda ruslar Kramatorskka yettita, Konstantinovkaga ikkita raketa hujumi uyushtirgan. Sanoat obyektlari shikastlangan, hech kim jabrlanmagan.
Xersonda ham tungi portlashlar qayd etilgan.
Ukraina Qurolli kuchlari Bosh shtabining 8-yanvar ertalabki hisobotida aytilishicha, Rossiya harbiylari, otashkesim e’lon qilinganiga qaramay, so‘nggi 24 soat ichida to‘qqizta raketa va uchta aviatsiya hujumi uyushtirgan, yoppasiga o‘t ochish tizimlaridan jumladan fuqarolik infratuzilmasiga 40 marta o‘t ochgan.
5-yanvar kuni Vladimir Putin Rossiya Mudofaa vazirligiga Ukrainada 36 soat — 2023-yil 6-yanvar soat 12:00 dan 7-yanvar 24:00 ga qadar front chizig‘i bo‘ylab o‘t ochishni to‘xtatish rejimini e’lon qilishni buyurgandi. Bu Patriarx Kirillning “Rojdestvo sulhi” haqidagi chaqirig‘idan keyin sodir bo‘ldi. Bir tomonlama sulh kuchga kirgandan so‘ng, Kiyev va Vashington Rossiya qo‘shinlari jangni davom ettirganini xabar qildi. Rossiya Mudofaa vazirligi ular o‘t ochishni to‘xtatish rejimiga rioya qilayotgani, biroq Ukraina tomonidan bo‘layotgan hujumga javob berayotganini da’vo qildi.
Izoh (0)