Britaniyaning The Times gazetasi Ukraina bir necha oy ichida o‘z yadroviy qurolini yaratish imkoniyatiga egaligini ma’lum qildi. Ukraina Tashqi ishlar vazirligi esa bunga munosabat bildirdi.
Ukraina yadro quroli ishlab chiqaradimi?
Ukraina Yadro qurolini tarqatmaslik to‘g‘risidagi shartnomaga amal qiladi; biz yadroviy qurolga egalik qilmaymiz, ishlab chiqmaymiz va yaratmoqchi emasmiz. Ukraina MAGATE bilan yaqindan hamkorlik olib boradi va uning nazorati uchun to‘liq ochiq, bu esa yadroviy materiallardan harbiy maqsadlarda foydalanish imkoniyatini istisno qiladi, deb ta’kidladi Tashqi ishlar vazirligi rasmiysi Georgiy Tixiy.
The Times nashriga ko‘ra, agar AQSHning yangi prezidenti Donald Tramp harbiy yordamni qisqartirsa, Ukraina oddiy yadro bombasini ishlab chiqishi mumkin. Mazkur ma’lumotlar Ukraina Mudofaa vazirligi uchun tayyorlangan hisobotda aks etgan. Hisobotni armiya, konversiya va qurolsizlanish tadqiqotlari markazi, Ukrainaning nufuzli harbiy tahlil markazi tayyorlagan.
Gazeta iqtibos keltirgan hujjatda aytilishicha, Ukraina 1945-yil avgust oyida AQSH Yaponiyaning Nagasaki shahriga tashlagan Fat Man bombasiga o‘xshash texnologiya bo‘yicha plutoniy qurilmasini tezda yaratishi mumkin.
Manxetten loyihasi doirasida Qo‘shma Shtatlar kabi oddiy atom bombasini yaratish 80 yildan keyin qiyin vazifa bo‘lmaydi, deyiladi hisobotda.
Yaratilgan bombaning quvvati Fat Man quvvatining taxminan o‘ndan biriga teng bo‘lishi ta’kidlanmoqda.
Bu butun bir Rossiya aviabazasini yoki to‘plangan harbiy, sanoat yoxud logistika obyektlarini yo‘q qilish uchun yetarli bo‘lardi. Yadro zaryadining aniq quvvatini oldindan aytib bo‘lmaydi, chunki unda turli xil plutoniy izotoplari qo‘llanadi, dedi hisobot mualliflaridan biri, Milliy strategik tadqiqotlar instituti bo‘lim boshlig‘i Aleksey Yejak.
Maqolada Ukraina uranni boyitish uchun zarur bo‘lgan katta inshootlarni qurish va ishlatishga vaqt sarflamaslik uchun, ehtimol, yadro reaktorlarining ishlatilgan yonilg‘i sterjenlaridan olingan plutoniydan foydalanishi mumkinligi aytilgan. Qurolsizlanish masalalari bo‘yicha mutaxassis Pavel Podvig maqolani “mutlaq aqldan ozish” deb baholadi.
Chamasi, Ukraina “yuzlab turdagi qurol” yaratish uchun foydalanishi mumkin bo‘lgan yetti tonna plutoniyga ega, degan dalil keltirilmoqda. Biroq bu plutoniyning barchasi ishlatilgan yonilg‘ida joylashgan. Uni ajratib olish uchun Ukrainada mavjud bo‘lmagan qayta ishlash zavodi zarur, dedi Podvig.
Izoh (0)