23-yanvar kuni ertalab rus qo‘shinlari Ukrainaga katta hujum uyushtirdi. Ukraina Ichki ishlar vazirligining so‘nggi maʼlumotlariga ko‘ra, Kiyev, Xarkov va Dnepropetrovsk viloyatlarining o‘qqa tutilishi oqibatida to‘rt kishi halok bo‘lgan, bir fuqaro klinik o‘lim holatida, 50 dan ortiq odam jarohatlangan.
Ukraina Qurolli kuchlari bosh qo‘mondoni Valeriy Zalujniyning aytishicha, Rossiya qo‘shinlari qanotli, ballistik, aviatsiya va zenit raketalari yordamida Ukraina hududiga jami 41 ta raketa uchirdi. Unga ko‘ra, Ukraina havo hujumidan mudofaa kuchlari 21 ta raketani urib tushirgan: 15 ta X-101/X-555/X-55 qanotli raketalari, “Iskander-M” majmuasidan uchirilgan beshta ballistik raketa, shuningdek, bitta X-59 boshqariladigan raketa. Ukraina Qurolli kuchlari bosh qo‘mondoni ta’kidlashicha, ballistik trayektoriya bo‘yicha otilgan Rossiya raketalarining hammasi ham nishonga yetib bormagan.
Rossiya harbiylari Ukraina poytaxtiga bir necha bosqichda hujum qildi, dedi Kiyev harbiy ma’muriyati rahbari Sergey Popko. Avvaliga Rossiya qo‘shinlari Saratov viloyatidan Tu-95MS strategik bombardimonchi samolyotlaridan X-101/X-555/X-55 qanotli raketalarini, keyin esa quruqlikdagi ballistik raketalarni uchirgan. Havo mudofaa kuchlari “qariyb yigirmata” raketani urib tushirgan.
Hujumda shaharning bir qancha hududlari shikastlangan. Shahar harbiy ma’muriyati ma’lumotlariga ko‘ra, Svyatoshinskiy tumanida avtomobillar yonib ketgan, ko‘p qavatli turar joy binosining kvartiralaridan birida yong‘in sodir bo‘lgan. Shu va Pecherskiy tumanlarida ham noturar joy binolar zarar ko‘rgan. Solomenskiy tumanida turar joy binosiga zarar yetgan, Darnitskiy tumanida urilgan raketa parchalari ko‘p qavatli uy tomi va bolalar bog‘chasi hududiga qulagan.
Shahar meri Vitaliy Klichkoning aytishicha, Svyatoshinskiy tumanidagi uyning xonadonlaridan birida portlamay qolgan raketa kallagi topilgan. Uy aholisi evakuatsiya qilingan. Xuddi shu hududdagi boshqa binoning birinchi qavatidan beshinchi qavatigacha bo‘lgan balkonlari va to‘rtta xonadon vayronalardan zarar ko‘rgan.
Shahar harbiy ma’muriyati Kiyevdagi otishmada bir kishi halok bo‘lganini ma’lum qildi. Klichkoning so‘nggi maʼlumotlariga ko‘ra, shaharda jabrlanganlar soni 18 kishi: 10 nafar katta yoshli odam va uch bola kasalxonaga yotqizilgan, yana to‘rt kishiga voqea joyida tibbiy yordam ko‘rsatilgan. Klichko marhum haqidagi ma’lumotni rad etmoqda. Uning so‘zlariga ko‘ra, fuqaro reanimatsiyaga yotqizilgan, u tirik.
Keyinroq Ukraina Ichki ishlar vazirligi kiyevlik ayol klinik o‘lim holatida ekani, shifokorlar uning hayoti uchun kurashayotgani haqida xabar berdi. Yana 21 kishi jarohatlangan.
Kiyev viloyati hududida urib tushirilgan raketa parchalari tushishi oqibatida uch kishi jarohat olgan. Turli rayonlarda uchta ko‘p qavatli uy, xususiy uy, xo‘jalik binolari, 12 ta yengil avtomobil, kafe shikastlangan, turar joylardan birining avtoturargohida yong‘in kelib chiqqan.
Shuningdek, Rossiya qo‘shini Xarkov shahrining Kiyev va Saltivka rayonlariga zarba bergan, deb xabar qildi viloyat harbiy ma’muriyati rahbari Oleg Sinegubov. Ukraina IIV ma’lumotiga ko‘ra, shaharda kamida uch kishi halok bo‘lib, 40 ga yaqin kishi jarohatlangan. Mahalliy rasmiylar jabrlanganlar soni 35 nafarligi, ulardan ikki nafari yosh bola ekanini xabar qilgan. Ko‘p kvartirali turar joy shikastlangan, xususiy uy, o‘quv muassasasi binosi hamda boshqa fuqarolik infratuzilmalari vayron bo‘lgan, avtomobillar yonib ketgan.
Xarkov meri Igor Terexovning xabar qilishicha, zarba oqibatida turar joy binosining podyezdlaridan biri to‘liq vayron bo‘lgan. Xarobalar ostida odamlar qolgan bo‘lishi mumkin. Kiyev tumanining zarba ostida qolgan qismi elektr va ichimlik suv ta’minotidan uzilgan.
Milliy politsiyaning Xarkov viloyati bo‘yicha tergov boshqarmasi boshlig‘i Sergey Bolvinov zarbalar vaqtida Xarkovning chekka hududi ham jabrlanganini ma’lum qilgan. Bu hududda xususiy sektordagi turar joy shikastlangan, bolalar va bir ayol jarohat olgan. Raketalardan biri gaz quvuriga urilishi oqibatida yong‘in kelib chiqqan.
“TASS” axborot agentligi Rossiya qo‘shini 23-yanvarga o‘tar kechasi “Xarkovdagi yollanma jangchilar manzili bo‘ylab aniq zarbalar bergani” haqida yozdi.
“Bu shaxslar qaysi mamlakatlar fuqarolari ekani to‘g‘risida hozircha ishonchli ma’lumot yo‘q, ammo bu ma’lumotga oydinlik kiritilmoqda”, — degan agentlik manbasi. Favqulodda xizmatlardagi bu manba Xarkovdagi turar joyga go‘yoki Ukraina Qurolli kuchlarining havo hujumidan mudofaa tizimi raketasi urilganini qo‘shimcha qilgan.
Dnipropetrovsk viloyatining Pavlograd shahri o‘qqa tutilishi oqibatida bir kishi halok bo‘lib, yana bir kishi jarohatlangan, deb xabar bergan region harbiy ma’muriyati rahbari Sergey Lisak.
Ukraina prezidenti ofisi rahbari Andrey Yermak ukrain shaharlari yoppasiga o‘qqa tutilishini “rossiyaliklar terrori” deb atadi.
“Bu terrorni faqat kuch bilan to‘xtatish mumkinligini dunyo tushunishi kerak. Dunyo yana shuni tushunishi kerakki, rossiyaliklarning raketalari hozir Ukraina bo‘ylab uchmoqda, ammo, agar bugun zaiflik namoyish etilsa, ertaga ular g‘arbdagi shaharlar ustidan uchadi”, — degan u.
Rossiya prezidenti matbuot kotibi Dmitriy Peskov Rossiya qo‘shini tinch aholiga zarba bermasligini ta’kidladi. U ertalab Ukrainadagi obyektlar bo‘ylab yo‘llangan zarbalarni Donetsk bo‘ylab hujumga javob deb hisoblash mumkinmi, deya berilgan savolga shunday javob qaytargan.
“Biz maxsus harbiy amaliyotimizni davom ettirmoqdamiz va harbiylarimiz ijtimoiy obyektlar va aholi kvartallari bo‘ylab zarba bermayapti. Kiyev rejimidan farqli o‘laroq, tinch aholiga zarba bermayapti. Bu bizning harbiylarni Kiyev rejimi harbiylaridan tubdan farqlab turadigan jihat”, — degan Kreml rasmiysi.
Izoh (0)