Shimoliy Koreya sharqiy suvlari tomon uzoq masofali ballistik raketa uchirdi. Bu haqda Janubiy Koreya shtab boshliqlari birlashgan qo‘mitasi ma’lum qildi.
Harbiy bayonotda raketa Shimoliy Koreyadan “yuqori burchak ostida” uchirilgani taxmin qilingan.
Yaponiya qirg‘oq qo‘riqlash xizmati raketa KXDRdan uchirilganini tasdiqlagan va u ballistik bo‘lishi mumkinligini ham aytgan. Mamlakat mudofaa vaziri Gen Nakatani raketa KXDR tarixidagi “eng uzoq parvoz vaqti”ga ega ekanini ta’kidlagan va “u oddiy raketalardan farq qilishi mumkinligini” qo‘shimcha qilgan.
Oq uy Milliy xavfsizlik kengashi matbuot kotibi Shon Savettning aytishicha, Qo‘shma Shtatlar Shimoliy Koreyaning “qit’alararo ballistik raketa sinovini” qat’iy qoralaydi. Uning qo‘shimcha qilishicha, uchirish “BMT Xavfsizlik kengashining ko‘plab rezolyutsiyalarini ochiqdan ochiq buzishdir”.
“Biz barcha mamlakatlarni ushbu qonunbuzarliklarni qoralashga, KXDRni beqarorlashtiruvchi harakatlarini to‘xtatishga va jiddiy muloqotga kirishishga chaqiramiz”, deyiladi Oq uy bayonotida.
29-oktyabr kuni AQSH Mudofaa vazirligi matbuot kotibi Patrik Rayder bir necha ming shimoliy koreyalik askarlar Rossiyaning Kursk viloyatiga qarab harakatlangani va ularning oz qismi allaqachon u yerga yetib borganini xabar qilgandi.
Bungacha Pentagon joylashtirilgan kuchlar sonini 10 ming kishi deb hisoblagan edi.
“Biz Shimoliy Koreya 10 mingga yaqin askarini Rossiya sharqida mashq qilish uchun yuborgan, deb hisoblaymiz”, dedi AQSH Mudofaa vazirligi matbuot kotibi Sabrina Singx Vashingtonda.
Izoh (0)