2023-yil yanvarida Rossiya hukumati 2022-yil kuzida armiyaga chaqirilgan 300 ming rossiyalikka qo‘shimcha ravishda yana 500 ming harbiyni safarbar etmoqchi. Bu haqda Britaniyaning The Guardian gazetasiga Ukraina Mudofaa vazirligi Harbiy razvedka bosh boshqarmasi rahbari o‘rinbosari Vadim Skibitskiy ma’lum qildi.
Uning da’vo qilishicha, Rossiyada safarbarlikning yangi to‘lqini qishki bayramlardan keyin, 15-yanvar kuni e’lon qilinadi. Ukraina razvedkasi taxmin qilishicha, Rossiyaga harbiy guruhlarni tayyorlash uchun qariyb ikki oy kerak bo‘ladi, Moskvaning jang maydonidagi har qanday yutug‘i esa rossiyaliklar qay darajada yaxshi qurollanganiga bog‘liq bo‘ladi. Skibitskiyning so‘zlariga ko‘ra, ko‘p narsa, shuningdek, Ukrainaga G‘arbdan o‘q-dori va qurol-yarog‘lar yetkazilishining davom ettirilishiga ham bog‘liq bo‘ladi.
“Agar Rossiya bu bosqichda mag‘lub bo‘lsa, u holda Putin halokatga uchraydi”, — degan fikrda Ukraina razvedkasi, ular kelayotgan olti-sakkiz oy davomida frontdagi vaziyat “so‘nggi zo‘r berish” holatida bo‘lishini aytmoqda.
“Ular Donetsk va Xarkov viloyatlarida, shuningdek, ehtimol Zaporojye viloyatida hujum harakatlariga o‘tishini, Xerson va Qrimda esa mudofaalanishini kutyapmiz. Bu vazifalarni amalga oshirish uchun ularga aynan shuncha harbiylar kerak bo‘ladi”, — dedi Skibitskiy Ukraina Mudofaa vazirligi Rossiyada safarbarlikning yangi bosqichi boshlanishini kutayotgani sababini izohalr ekan.
Ukraina prezidenti Vladimir Zelenskiy 3-yanvar kuni kechki murojaatida Rossiyada go‘yoki “yangi safarbarlik jarayonlari” tayyorlanayotgani haqida gapirgandi. Zelenskiy bu mavzuda Kanada, Niderlandiya, Buyuk Britaniya va Norvegiya bosh vazirlari bilan 3-yanvar kungi telefon suhbatlari chog‘ida gaplashgan.
30-dekabr kuni Ukraina mudofaa vaziri Oleksiy Reznikov yanvar oyi boshida Rossiya hukumati erkaklar uchun chegaralarni yopib, harbiy holat e’lon qilmoqchiligi va safarbarlikning navbatdagi to‘lqinini boshlamoqchiligini aytgandi. Ukraina Mudofaa vazirligining bosh razvedka boshqarmasi boshlig‘i Kirill Budanovning aytishicha, safarbarlikning yangi to‘lqini go‘yoki 5-yanvardan boshlanadi.
Reznikov ham, Budanov ham bunday ma’lumotni qayerdan olganiga izoh bermadi. Shu bilan birga, Ukraina Qurolli kuchlari bosh shtabi 31-dekabr kuni ertalabki hisobotida Qrim hududida 2023-yil yanvar oyida harbiy xizmatga chaqirilishi lozim bo‘lgan shaxslar ro‘yxati tuzilgani haqida ma’lum qildi.
Rossiyada qisman safarbarlik 21-sentabr kuni e’lon qilingandi. 28-oktabr kuni mudofaa vaziri Sergey Shoygu safarbarlik yakunlangani va berilgan barcha topshiriqlar bajarilgani haqida hisobot berdi. Shu bilan birga Putin safarbarlik yakunlangani haqida rasmiy hujjat imzolamagan.
Izoh (0)