Ўзбекистонда 1 июндан бошлаб йўл ҳаракати қоидаларини бузганлик учун жарима баллари тизими жорий этилди. Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизматининг матбуот котиби Зоир Йўлдошев “Спутник” нашрига берган интервьюсида тизим нима учун амалиётга татбиқ этилаётганини маълум қилди.
Унинг сўзларига кўра, янги тизим мамлакатдаги йўл ҳаракати хавфсизлигини кучайтириши ва ҳайдовчиларнинг масъулиятини ошириши кўзда тутилган. Жарима баллари тизими — бу жазо чоралари билан бирга қўлланиладиган баллар бўлиб, улар Ўзбекистон Маъмурий жавобгарлик кодексининг 12-моддасига асосланиб қўшилади. Ушбу тизим Ўзбекистонда Франция, Россия, Хитой, Озарбайжон ва Қозоғистон каби давлатларнинг тажрибасига асосланиб жорий этилмоқда.
Ўзбекистоннинг маъмурий кодексига киритилган жарима баллари тизими жиддий йўл ҳаракати қоидабузарликларини 12 та махсус модда асосида ҳисоблаб боради. Қўпол қоидабузарликларни доимий равишда содир этиб келаётганлар учун йўл-патрул хизмати ходимлари тузган баённомалар асосида ҳисобланади. Ҳар бир қоидабузарлик учун баллар 0,2 дан 2 баллгача ҳайдовчининг ҳисобига ёзилади.
Йилига 10 марта қизил чироқдан ўтган ҳайдовчини потенциал қотил деб ҳисоблаш мумкин. Улар ё ҳаракат қоидаларини билмай бузади, ё атайлаб эътибор бермайди. Янги тизим қоидабузарларга кучлироқ жазо бериш орқали уларни тўхтатишга қаратилган. Агар ҳайдовчи йил давомида қайта-қайта қоидаларни бузса, ҳар бир қоидабузарлик учун унга баллар ҳисобланади. Ҳайдовчи йил давомида жами 12 балл тўпласа, суд қарори билан камида 6 ой муддатга ҳайдовчилик гувоҳномасидан маҳрум қилинади, дейди ЙҲХХ вакили.
Изоҳ (0)