Қашқадарё вилоятида пиёдалар йўлагидан ўтаётган қизчани уриб юбориб, воқеа жойидан қочиб кетган Nexia ҳайдовчиси ушланди. Бу ҳақда ИИВ Йўл ҳаракати хавфсизлиги хизмати хабар берди.
Қайд этилишича, 19 март куни 20:30 ларда ИИОга Қарши шаҳри Қарлуқбогўт кўчасидаги пиёдалар ўтиш жойида номаълум транспорт воситаси йўлни кесиб ўтаётган пиёдани уриб юборгани тўғрисида хабар келиб тушган.
Ҳайдовчи тан жароҳати олган пиёдага биринчи тиббий ёрдам кўрсатмасдан, воқеа жойидан яширинган. Тан жароҳати олган пиёда тез тиббий ёрдам бўлимига ётқизилган.
Тегишли идоралар ҳамкорлигида ўтказилган тезкор қидирув ишлари натижасида ЙТҲни Nexia транспорт воситаси содир этгани аниқланган ва унинг ҳайдовчиси ушланган. Машина жарима майдонига жойлаштирилган.
Йўлдан ўтиб келаётган қизчани кўрмай қолиб, туртиб юбордим. Шокка тушиб қолиб, тўхтамасдан, кетдим, — дейди ҳайдовчи.
Ҳозирда ҳолат юзасидан дастлабки суриштирув ҳаракатлари олиб борилмоқда.
Аввалроқ Самарқанд ва Қашқадарёда юз берган ЙТҲ оқибатида икки пиёда ҳалок бўлгани тўғрисида хабар берилганди.
Изоҳ (0)