Бухорода йўл-ҳаракати қоидаларини бузиб, жарималарни бошқалар йўналтириб юбориш йўлини топган “уддабурон” ҳайдовчи аниқланди, деб хабар беради ИИВ ЙҲХХ ахборот хизмати.
Маълум бўлишича, ушбу ҳайдовчи турли автомобиль рақамларини қирқиб олиб, ҳаракатланиш давомида ўзининг Gentraъдаги давлат рақамларига жойлаштириб келган. Натижада қоидабузарлик учун белгиланган жарималар бошқа ҳайдовчилар номига борган.
“Камералардан яширинмоқчи бўлган бу каби масъулиятсиз, қоидабузар ҳайдовчилар сабаб айрим вақтларда жарима қоғози бошқа манзилга ҳам бориш ҳолатлари кузатилмоқда. Суриштирув олиб борилиб, ҳолатга тўлиқ ойдинлик киритилгандан сўнг, барибир асл қоидабузар аниқланяпти”, — дейилади хабарда.
Қоидабузар ҳайдовчига нисбатан маъмурий баённома расмийлаштирилган.
Эслатиб ўтамиз, Ўзбекистонда 2022 йил 1 декабрдан ҳайдовчилар учун жарима балларини ҳисоблаш тизими тест режимида ишга туширилган. Бунда қоидабузарликлар автоматик тарзда дастурий таъминотда қайд этиб борилади. Ушбу тизим янги бўлганлиги сабабли, тест режимида ишлаган вақтда тизимдаги ҳамда содир этилган қоидабузарликлардаги барча хато ва камчиликлар тизимни техник қўллаб-қувватлаш даврида босқичма-босқич аниқланиб, бартараф этилиб, такомиллаштирилиб борилади.
Изоҳ (0)