Қорақалпоғистонда йўл-патрул ходими автомобилни юқори тезликда, телефондан фойдаланган ҳолда бошқарган 20 яшар йигитни ортидан қувиб қўлга олди. Қўлга олиниш жараёнини монтаж қилиб, интернетда тарқатган шахслар бўйича суриштирув бошланди. Бу ҳақда ЙҲХХ ахборот хизмати раҳбари Зойир Йўлдошев хабар берди.
Ҳодиса 24 май куни Қонғирот туманидаги мактаб яқинида содир бўлган. Инспектор Damas автомобилини юқори тезликда ва телефондан фойдаланиб бошқарган йигитни тўхтатган. У мактаб ўқувчиси эмаслиги маълум қилинган. Ҳайдовчидан тегишли ҳужжатлар сўралганида, 20 ёшли йигит ҳужжатларини тақдим эта олмаган. У акасига тегишли автомашинани бошқаргани аниқланган.
46 ёшли ЙПХ ходими қоидабузар йигитнинг ортидан қувиб, 30 сонияда қўлга олган. Ҳолат юзасидан автомобиль жарима майдонига қўйилган. Ҳайдовчи ва унга автомобилини берган акасига эса маъмурий баённома расмийлаштирилган.
Шунингдек, инспекторнинг ҳайдовчини қўлга олиш жараёнини монтаж қилиб, ижтимоий тармоқларда тарқатган шахсларга нисбатан суриштирув ишлари олиб борилмоқда. Улар БҲМнинг 50 бараваригача жаримага тортилиши ёки 10 суткагача маъмурий қамоқ жазоси билан жазоланиши мумкин.
Изоҳ (0)