Наманган вилоятида вояга етмаган шахс отасининг Equinox автомобилида қатор қоидабузарликлар содир этиб, ЙТҲга учради. Бу ҳақда ИИВ ЙҲХХ ахборот хизмати хабар берди.
Ижтимоий тармоқларда Наманганда авторақамсиз ҳолда қоидаларни бузиб юрган Equinox машинаси тасвирланган видео тарқалди. Маълум қилинишича, видеода тасвирланган ҳолат 2023 йил сентябрь ойида содир бўлган. 2007 йилда туғилган ўсмир отаси хизмат сафарига кетганидан фойдаланиб, унга тегишли машинани сўроқсиз ҳайдаган.
У машина давлат рақамларини ечиб, шаҳар кўчалари бўйлаб қоидаларни қўпол тарзда бузган ҳолда ҳаракатланган. Сўнг ҳолатни видеога олиб, ижтимоий тармоқларга жойлаган.
Наманган вилояти ИИБ ЙҲХБ ходимлари томонидан ўсмир ва машина топилиб, унга нисбатан тегишли чоралар кўрилган.
Жумладан, машина эгасига нисбатан:
- давлат рақамларини ўзбошимчалик билан ечиб ҳаракатлангани учун Маъмурий жавобгарлик тўғрисидаги кодекснинг 125-моддаси 5-қисми билан;
- ҳайдовчи ёшига етмасдан тегишли ҳужжатларсиз машина бошқаргани ва вояга етмаган шахсга транспорт воситасини бошқаришга топширгани учун Маъмурий жавобгарлик тўғрисидаги кодекснинг 135-моддаси 2-қисми билан;
- тегишли рухсат олмасдан машинага товуш чиқарувчи ва махсус ёритиш ускунасини ўрнатгани учун Маъмурий жавобгарлик тўғрисидаги кодекснинг 127-моддаси 2-қисми билан;
- йўл ҳаракати қоидаларини бузиб, авария ҳолатини келтириб чиқаргани учун Маъмурий жавобгарлик тўғрисидаги кодекснинг 128-прим 5-моддаси 2-қисми билан маъмурий баённомалар расмийлаштирилган.
“Бу турдаги қоидабузарликлар ортидан машина жарима майдонига жойлаштирилиши керак эди. Бироқ ўсмир йўл-транспорт ҳодисасига учрагани ва машина таъмирда бўлгани учун бунинг иложи бўлмаган”, — дейилади хабарда.
Аввалроқ Наманган шаҳар Ислом Каримов кўчасида 1 январь кечаси бир қатор қоидабузарликларни содир этган Mercedes-Benz ҳайдовчисига чора кўрилгани тўғрисида хабар берилганди.
Изоҳ (0)