Навоий вилоятида таркибида тилла зарралари бўлиши мумкин бўлган қумларни олиб келаётган Cobalt ҳайдовчиси Йўл патрул хизмати ходимларига пора беришга уринди. Бу ҳақда ИИВ Йўл ҳаракати хавфсизлиги хизмати хабар берди.
Қайд этилишича, 9 март куни Навбаҳор кузатув постида хизмат олиб бораётган ЙПХ ходими Нурота йўналиши бўйича ҳаракатланиб келаётган Cobalt русумли транспорт воситасини тўхтатган. Ўрганишлар давомида автомашина юкхонасида қопга ва бешта елим идишга солинган, таркибида тилла зарралари бўлиши мумкин бўлган қумлар борлиги аниқланган.
Инспекторлар машинани жарима майдонига жойлаштирган. Ҳайдовчи эса автомобилини чиқариб бериш эвазига ЙПХ ходимига 1 миллион сўм миқдорида пора таклиф қилган. Инспектор унинг бу хатти-ҳаракати ноқонуний экани, Жиноят кодексининг тегишли моддалари билан жиноий жавобгарлик борлигини тушунтирган.
Шундан сўнг, фуқаро шу жойда хизмат олиб бораётган ЙПХ батальони сафарбар гуруҳи командири ўринбосари билан мулоқотга киришган ва унга ҳам пора таклиф қилган. Командир ўринбосарининг Навоий вилояти ИИБ бошлиғи номига ёзган билдиргисига асосан ИИВ Шахсий хавфсизлик бўлими ва департамент ходимлари томонидан тезкор тадбир ўтказилган ҳамда фуқаро 1 миллион пулни бераётганида ашёвий далиллар билан ушланган.
ЙПХ ходимларига пора бериш ҳолатлари
2023 йилда Бухорода маст ҳолда машина бошқарган ҳайдовчи ЙПХ инспекторига 100 доллар пора беришга урингани тўғрисида хабар берилганди. Шунингдек, Бойсун туманида ЙПХ инспекторига пора беришга уринган қоидабузар ҳайдовчига нисбатан жиноят иши қўзғатилган эди. Ўша йилнинг апрель ойида бўлса Сурхондарёда ЙПХ инспектори 800 доллар пора олаётганида қўлга тушганди.
Изоҳ (0)