Ўзбекистон Суперлигасининг 11-туридан ўрин олган баҳсда Наманганнинг “Навбаҳор” жамоаси ўз майдонида “Қўқон-1912” клубини қабул қилди.
Гарчи қўқонликлар икки йиллик танаффусдан сўнг суперлига йўлланмасини қўлга киритган бўлса ҳам, етакчи жамоаларга муносиб қаршилик кўрсатиб келмоқда. Сергей Лушан шогирдлари эса сўнгги ўйинларни аъло даражада ўтказиб, ғалаба қозониб келмоқда, қолаверса, шу куни Наманганда халқаро гуллар фестивали бошланди. Шу боис ушбу беллашувга қизиқиш юқори бўлди.
Илк дақиқалардан устунликни ўз қўлига олишга интилган “лочинлар” рақиб дарвозаси олдида хавфли вазиятларни юзага келтира бошлади. Шундай ҳужумларнинг бирида “Навбаҳор” Русланбек Жияновнинг бурчакдан ҳаволатиб оширган тўпини Игор Габриэль боши билан дарвозага аниқ йўллаб, ҳисобни очди – 1:0.
Орадан икки дақиқа ўтар-ўтмас, Алишер Одиловнинг чап қанотдан меҳмонлар жарима майдончаси ичига узатиб берган тўпини Аббос Ғуломов дарвозага аниқ йўллаб жамоасини танаффусга 2:0 ҳисобида чиқиб кетишини таъминлади.
Иккинчи бўлимни ҳужумкор тарзда бошлаган “Навбаҳор” вакиллари 47-дақиқада пенальти ишлади. Пенальтини Русланбек Жиянов аниқ амалга ошириб, ҳисобнинг йирик кўриниш олишини таъминлади – 3:0.
Баҳром Ҳайдаров шогирдларининг навбатдаги қарши ҳужумларидан бирида мезбонлар жарима майдончаси ичида рақиб футболчисига нисбатан қўполлик ишлатгани учун учрашув бош ҳаками Темур Тўхтасинов бу сафар “Навбаҳор” дарвозасига 11 метрли жарима зарбаси белгилади. Бироқ пенальтидан сўнг тўп дарвоза устунига тегиб қайтди.
Учрашувнинг қолган дақиқаларида гол урилмади ва мазкур ўйинда “Навбаҳор” 3:0 ҳисобида ғалаба қозониб, очколари сонини 20 тага етказиб олди.
“Дарё” “Навбаҳор” ва ““Қўқон-1912” жамоалари ўртасидаги ўйиндан фотогалерея тайёрлади.
Изоҳ (0)