Тошкент шаҳрида қарама-қарши йўналиш бўйлаб ҳаракатланиб, йўл-ҳаракати қоидаларини бузган автоблогерга чора кўрмай қўйиб юборган ЙПХ ходимига ҳайфсан берилди. Бу ҳақда ИИВ ЙҲХББ ахборот хизмати хабар берди.
Маълум қилинишича, 9 март куни ижтимоий тармоқларда «Қарама-қарши юрган ҳайдовчига ЙПХ ходими жарима тузмади» сарлавҳаси остида видеолавҳа тарқалган. Видеолавҳада ЙПХ ходими Ф.Сайхаматов томонидан ҳайдовчи Отабек Машрапов бошқарувидаги автомобиль тўхтатилгани, ходим ҳайдовчига қоидабузарлик содир этганлигини айтганини кўриш мумкин. Лекин ЙПХ ходими ҳайдовчига нисбатан ўрнатилган тартибда маъмурий баённома расмийлаштирмасдан, йўлида давом этишига рухсат бериб юборган.
Таъкидланишича, мазкур ҳолат юзасидан Тошкент шаҳар ИИББ ЙҲХБ томонидан хизмат текшируви ўтказилган.
Текширув хулосасига кўра, хизмати давомида Вазирлар Маҳкамасининг 2018 йил 1 декабрдаги 975-сон қарори билан тасдиқланган «Йўл-патруль хизмати ходимларининг йўл ҳаракати қатнашчилари билан ўзаро муносабатлари ҳамда махсус мосламалардан фойдаланиши тартиби тўғрисида»ги низом ҳамда ички ишлар вазирининг айрим меъёрий буйруқлари талабларини бузганлиги аниқланган.
Шу сабаб Тошкент шаҳар ИИББ ЙҲХБ ЙПХ ходими Ф.Сайхаматовга ҳамда қўл остидаги ходимлар устида кунлик ва идоравий назоратни етарли даражада олиб бормаганлиги учун Тошкент шаҳар ИИББ ЙҲХБ ЙПХБ махсус дивизион командири Ж.Мўминовга ҳайфсан интизомий жазоси қўлланилиши бўйича хулоса қабул қилинган.
Изоҳ (0)