Самарқанд вилояти Нуробод туманида жамоаси ютқизгани учун ҳайдовчи машинасини одамлар устига ҳайдади. Бу ҳақда ЙҲХХ хабар берди.
Унга кўра, Нуробод туманида жойлашган умумтаълим мактаби олдидаги футбол майдончасида Nexia ҳайдовчиси ўзи ва ўзгалар ҳаётига хавф туғдириб, турли қоидабузарликлар содир этган. Мазкур ҳолат юзасидан ЙҲХБ ходимлари томонидан олиб борилган суриштирув ишлари натижасида ҳайдовчи ва автомашина топилди.
Ҳайдовчига нисбатан қонуний тартибда маъмурий баённома расмийлаштирилиб, машина вақтинчалик жарима майдончасига олиб келинди.
“Команда”м ютқизиб қўйгани сабабли жаҳл устида машинамга ўтириб, футбол майдончасига кирдим ва қўполлик қилдим. Билмаган ҳолда қилдим. Жаҳл устида автомашина бошқариб, жарима майдончасигача келдим, дейди ҳайдовчи.
2024 йил 29 май куни соат 18:00 ларда Сурхондарё вилоятининг Сайхунобод туманида футбол майдонидаги одамлар устига машина ҳайдаган ҳайдовчи қўлга олинган эди. Унга нисбатан 4 йил 6 ой озодликдан маҳрум қилиш жазоси тайинланган.
Суд ҳукмига кўра мазкур автомашинани давлат даромадига ўтказиш белгиланиб, ижроси Мажбурий ижро бюросига юклатилган эди. Бюронинг Сайхунобод туман бўлими томонидан олиб борилган ижро ҳаракатлари давомида мазкур автомашина баҳоланган ва аукционга чиқарилган.
Жорий йилнинг 3 март куни ўтказилган аукционда машина 100 млн 567 минг сўмга сотилиб, сотувдан тушган маблағ давлат даромадига ўтказилиши таъминланди.
Изоҳ (0)