Қорақалпоғистон Республикаси Нукус шаҳрида тўй маросими вақтида қоидабузарлик содир этган ҳайдовчиларга чора кўрилди. Бу ҳақда ИИВ Йўл ҳаракати хавфсизлиги хизмати хабар берди.
Нукус шаҳридаги бир нечта автомашиналар ҳайдовчилари ўзбошимчалик билан давлат рақамини ечиб олиб, гуруҳ бўлиб, турли манёврлар қилиб, йўл талашиб ЙТҲ содир этгани акс этган видео ижтимоий тармоқларга тарқалди.
Аниқланишича, ҳолат 11 январь куни Нукус шаҳрида тўй маросимида содир бўлган. Гуруҳ бўлиб ҳаракатланган автомашиналар текширилганда 15 та автомашина ушбу қоидабузарликни содир этгани маълум бўлган. Қоидабузар ҳайдовчиларга нисбатан Маъмурий жавобгарлик тўғрисидаги кодекснинг 129-моддаси (транспорт воситалари ҳайдовчиларининг йўл ҳаракати хавфсизлигига таҳдид солувчи гуруҳ бўлиб ҳаракат қилишда қатнашиши) тартибида баённома расмийлаштирилган ҳамда ушбу кодекснинг 291-моддаси (транспорт воситаларини ушлаб туриш ва кўрикдан ўтказиш асослари ва тартиби) билан автомашиналар вақтинчалик сақлаш учун жарима майдончасига жойлаштирилган.
Аввалроқ Тошкент шаҳар Чилонзор туманида янги йил кечаси қўпол қоидабузарлик содир этган йигитлар жавобгарликка тортилгани тўғрисида хабар берилганди. Шунингдек, Самарқанд шаҳрида 2023 йил 1 январга ўтар кечаси Mercedes-Benz’да дрифт қилган ҳайдовчи жавобгарликка тортилган эди. Ундан олдин эса Нукусда рақамсиз ҳаракатланиб, дрифт қилган “шумахер” топилганди.
Изоҳ (0)