Ангренда 4 нафар мактаб ўқувчиси битирув кечасига пул топиш мақсадида ўғрилик содир этди. Бу ҳақда Тошкент вилояти ИИББ матбуот хизмати хабар берди.
Маълум қилинишича, 16 апрелдан 17 апрель кунига ўтар кечаси Ангрен шаҳри “Нурчи” маҳалласида номаълум шахс Damasъдан пул ўғирлагани ҳақида ҳудудий Ички ишлар бўлимига хабар келиб тушган. Ҳолат ўрганилиб, тегишли тартибда жиноят иши қўзғатилган.
Олиб борилган тезкор чоралар натижасида бу қилмишни 15–17 ёшдаги тўрт нафар мактаб ўқувчиси содир этгани аниқланиб, фош этилди ва улар процессуал тартибда ушланди. Дастлабки тергов давомида гумонланувчилар ушбу ўғирланган пулларни мактаб битирув кечаси учун керак бўлган харажатларни қоплаш мақсадида олганини билдирган.
Бу каби ҳолатлар барчамизни бирдек ўйлантириши керак. Чунки битирув кечалари ва шу каби тадбирлардаги ортиқча харажатлар, “бошқалардан қолмаслик” ҳисси, моддий босим — айрим ўқувчиларни жиноятга бошламоқда, дейди бош бошқарма матбуот котиби Бобур Тўлаганов.
ИИББ барча ота-оналарни огоҳликка чақириб, фарзандлар ҳаёт тарзи, мактабдаги ҳолати, кимлар билан муомалада экани, интернетдаги фаолияти ва молиявий эҳтиёжларига эътиборли бўлшга чақирди.
Ўғрилик учун жазо
Жиноят кодекси 169-моддасига кўра, ўғрилик, яъни ўзганинг мол-мулкини яширин равишда талон-торож қилиш — БҲМнинг 50 бараваригача (18 миллион 750 минг сўм) миқдорда жарима ёки 360 соатгача мажбурий жамоат ишлари ёки 2 йилгача ахлоқ тузатиш ишлари ёки 1 йилдан 3 йилгача озодликни чеклаш ёхуд 3 йилгача озодликдан маҳрум қилиш билан жазоланади.
Бир гуруҳ шахслар томонидан олдиндан тил бириктириб содир этилган бўлса, БҲМнинг 300 бараваригача (112,5 миллион сўм) миқдорда жарима ёки 2 йилдан 3 йилгача ахлоқ тузатиш ишлари ёки 3 йилдан 5 йилгача озодликни чеклаш ёхуд 3 йилдан 5 йилгача озодликдан маҳрум қилиш билан жазоланади.
Изоҳ (0)