ИИВ ЙҲХББ ижтимоий тармоқларда тарқалган Тошкентдаги кўчалардан бири бўйлаб хавфли манёврларни бажарган ҳолда ҳаракатланган Lacetti видеоси бўйича маълумот берди.
Ижтимоий тармоқларда Юнусобод туманида Lacetti автомобили орқамача ҳаракатланаётгани тасвирланган видео тарқалди.
Идора матбуот хизматининг маълум қилишича, видеодаги ҳолат 4 сентябрь куни соат 22:50 ларда Юнусобод тумани Алишер Навоий кўчасида содир бўлган. 30 ёшли Ж.К. Lacetti автомобилида хавфли манёврлар билан, рухсат этилмаган бўлса-да транспорт воситасига ялт-ялт ёнувчи маёқчалар ўрнатган ҳолда ҳаракатланган. Таъкидланишича, ҳайдовчи ушбу қоидабузарлик содир этилган кўчада хизмат олиб борган ЙПХ ходими З.Аҳмаджонов томонидан тўхтатилган.
Текширув давомида автомобиль ён ойналарининг туси тегишли рухсатномасиз қорайтирилгани ҳам аниқланган. Ҳайдовчи ЙПХ ходимининг қонуний талабларини бажармаган.
Унга нисбатан Маъмурий жавобгарлик тўғрисидаги кодекснинг 126-(кўзгусимон ва туси ўзгартирилган ойнали, шунингдек, теварак-атрофни кўришни чеклайдиган қопламали транспорт воситаларидан фойдаланиш), 128-(транспорт воситалари ҳайдовчиларининг халақит бериши ёки авария ҳолатини юзага келтириши, йўлнинг қарама-қарши ҳаракатланиш учун мўлжалланган томонига ёки бўлагига чиқиши), 135-(йўл ҳаракати қоидаларида назарда тутилган ҳужжатлари бўлмаган шахсларнинг транспорт воситаларини бошқариши) ҳамда 194-моддалари (ички ишлар ходимининг қонуний талабларини бажармаслик) тартибида маъмурий баённома расмийлаштирилган ва автомобиль вақтинча сақлаш учун жарима майдонига қўйилган.
Аввалроқ Тошкентда Spark устида шеригини боғлаб, TikTok’ка ролик суратга олган блогерлар 10 суткага қамалгани, Тошкентда ЙПХ ходимига бўйсунмай, «бор, йўқол» деб йўлида давом этган ҳайдовчининг Equinox’и жарима майдончасига жойлаштирилгани, Тошкентда йўлнинг қатнов қисмида дрифт қилган ҳайдовчига чора кўрилгани тўғрисида хабар берилганди.
Изоҳ (0)