Санкт-Петербургнинг Лисий Нос ўрмонида пичоқ жароҳатлари билан, бошига қоп кийдирилган ўзбекистонлик эркак топилди. Бу ҳақда “Дорожний инспектор” Telegram канали хабар берди.
Воқеа жойига етиб келган Приморск тумани ИИБ ходимлари билан суҳбатда, эркак бир кун олдин Сестрорецкда номаълум шахслар томонидан олиб қочилганини айтиб берди.
Маълум қилишича, эркак ишдан сўнг дўконга кирган. Шу пайтда номаълум шахслар унинг бошига қоп кийдириб, олиб қочиб кетишган. Бир оз вақт ўтгач, у қариндошларига қўнғироқ қилиб, ҳужум қилганлар ундан 55 минг рубль талаб қилаётганини айтган. Жабрланувчини ўрмонга олиб бориб бир неча марта пичоқлаб, ташлаб кетишган.
Ҳужум қилганлар қонга беланган пичоқни эркакнинг ёнида қолдирган. Ўрмонда қонга беланиб ётган эркакни кўрган аҳоли вакиллари тез ёрдам чақиришган ва у шифохонага олиб кетилган.
Жабрланувчи 1997 йилда туғилган Ўзбекистон фуқароси бўлган. Содир бўлган ҳодисанинг тафсилотлари тергов жараёнида аниқланмоқда.
Февраль ойида Санкт Петербург шаҳри Москва туманидаги қурилишда ўзбекистонлик мигрант ҳалок бўлганди.
Изоҳ (0)