АҚШ президенти Дональд Трамп Россия президенти билан “тинчлик шартномасининг кўп қисмларини” муҳокама қилгани ва можарони “тўлиқ куч билан” ҳал этиш жараёни бошланганини маълум қилди. Бу ҳақда у мулоқотдан сўнг ўзининг Truth Social ижтимоий тармоғидаги саҳифасида муносабат билдирди.
Трамп Россия президенти Владимир Путин билан суҳбат “жуда яхши ва самарали” бўлганини билдирган.
Таъкидланичиша, суҳбат давомида тинчлик шартномасининг кўп қисмлари муҳокама қилинган, шунингдек, Украина можароси пайтида энергетика ва нефть инфратузилмасига ҳужумларни тўхтатишга келишиб олинган.
“Биз тўлиқ ўт очишни тўхтатишга эришиш ва охир-оқибат Россия ва Украина ўртасидаги бу даҳшатли урушга чек қўйиш учун тез ишлашимиз кераклигини тушунган ҳолда, энергетика ва инфратузилма соҳасида дарҳол ўт очишни тўхтатишга келишиб олдик”, дейди Америка раҳбари.
Трамп, шунингдек, ўша пайтда АҚШ президенти бўлганида уруш ҳеч қачон бошланмаслиги ҳақидаги баёнотини яна бир бор такрорлаган.
“Тинчлик келишувининг кўп қисмлари, жумладан, минглаб аскарлар ҳалок бўлаётгани муҳокама қилинди ва ҳам президент Путин, ҳам президент (Украина Владимир) Зеленский бунга чек қўйилишини истайди. Бу жараён ҳозир тўлиқ куч ва самарадорлик билан олдинга силжимоқда”, деди Трамп.
Трампнинг Путин билан телефон орқали суҳбатидан сўнг Оқ уй икки раҳбар энергетика ва инфратузилма соҳасида ўт очишни тўхтатиш, шунингдек, Украинадаги урушни тугатиш бўйича кейинги қадамлар юзасидан зудлик билан музокараларни бошлашга келишиб олганини маълум қилди. Музокаралар Яқин Шарқда ўтказилади.
Кремль, ўз навбатида, Путин Украина энергетика инфратузилмасига 30 кун давомида ҳужумларни тўхтатишга рози бўлганини ва аллақачон Россия армиясига тегишли буйруқ берганини маълум қилди. Шунингдек, у Ғарбнинг Украинага ҳарбий ёрдамини бутунлай тўхтатишни талаб қилди.
Изоҳ (0)