Украина президенти Владимир Зеленский 15 май куни Истанбулда бўлиб ўтадиган тинчлик музокараларида Россия раҳбари Владимир Путин билан нималарни муҳокама қилишини айтди. Бу ҳақда Liberation хабар берди.
Биз у билан дарҳол ҳамма нарсани келишиб ололмаймиз. Бу имконсиз — бизнинг ҳаётга қарашларимиз, дунёқарашларимиз турлича. Аммо қандай бўлмасин, урушни тўхтатиш учун йўл топишимиз шарт. Шубҳасиз, келишиб олишимиз зарур бўлган масалалар бор ва техник тафсилотларни бошқа форматда муҳокама қилишимиз мумкин.
Агар Путин билан учрашсам, учрашув сиёсий ғалаба билан якунланиши лозим — ўт очишни тўхтатиш, “барчага барчани” тамойили асосида асирларни алмашиш ёки шунга ўхшаш нарса. Агар у келмаса, демак, унга сиёсий ғалаба керак эмас — бошқа давлатлар учун ҳам, дея таъкидлади Украина президенти.
Зеленский уруш қанча давом этишини ҳеч ким билмаслигини қайд этди.
Лекин ўн йил эмас. Украина бардош беролмайди... Бу ҳамма учун, нафақат дўстлар, балки душманлар учун ҳам қимматга тушади, дея хулоса қилди сиёсатчи.
Россия президенти Владимир Путин 15 май куни Истанбулда можаро томонлари иштирокида тўғридан-тўғри музокаралар ўтказишни таклиф қилганди. Шундан сўнг АҚШ президенти Дональд Трамп украиналик ҳамкасбини мазкур музокарага рози бўлишга чақирганди.
Улар ҳеч бўлмаганда келишув имкониятини аниқлай олади. Агар бу имконсиз бўлса, Европа раҳбарлари ва АҚШ вазиятдан хабардор бўлиб, тегишли чоралар кўради!...Мен Украинанинг Путин билан келишувга боришига шубҳа қила бошладим. Путин эса Америка Қўшма Штатлари ёрдамисиз ҳеч қачон ғалаба қозониши мумкин бўлмаган Иккинчи жаҳон урушидаги ғалабани нишонлаш билан овора. УЧРАШИНГ, ҲОЗИРОҚ!, деб ёзган Трамп.
Бунга жавобан Украина президенти музокараларда шахсан Владимир Путинни кутишини қайд этган. Кремль музокараларда қатнашадиган Россия делегацияси таркибини ҳозирча ошкор қилмаяпти. Кремлнинг собиқ юқори мартабали амалдори 13 май куни The Washington Post нашрида хабар беришича, музокараларда Россия номидан Ташқи ишлар вазири Сергей Лавров ва Россия президенти ёрдамчиси Юрий Ушаков иштирок этади.
Бироқ Зеленский офиси вакили Истанбулда Россия президентидан ташқари бошқа ҳеч бир рус вакили билан музокара ўтказилмаслигини қайд этган.
Изоҳ (0)