Ҳиндистон ва Покистон ҳарбий операциялари қўмондонлари икки мамлакат ўртасидаги ўт очишни тўхтатиш тўғрисидаги келишувни муҳокама қилмоқда. Бу ҳақда News18 телеканали хабар бермоқда.
“Ҳиндистон ва Покистон ҳарбий операциялари қўмондонлари икки мамлакат ўртасида ўт очишни тўхтатиш бўйича келишув юзасидан музокаралар олиб бормоқда”, дейилади телеканал хабарида.
Ҳарбий операциялар қўмондони лавозими Ҳиндистон армиясидаги энг нуфузли лавозимлардан бири ҳисобланади. У бевосита армия штаби бошлиғига бўйсунади ҳамда мамлакат ичкарисида ва ташқарисидаги барча ҳарбий операцияларни режалаштириш ва ўтказишда ҳал қилувчи рол ўйнайди.
Ҳиндистон ва Покистон ўртасидаги муносабатлар 22 апрель куни Ҳиндистоннинг Жамму ва Кашмир ҳудудидаги Пахалгам шаҳри яқинида содир этилган терактдан сўнг яна бир бор кескинлашди. Террорчилар ҳужуми натижасида 25 нафар ҳиндистонлик ва бир нафар непаллик ҳалок бўлди. Ҳиндистон ҳужумга Покистон махсус хизматлари алоқадорлиги ҳақида далилларга эга эканини маълум қилди. Покистон Бош вазири Шаҳбоз Шариф Ҳиндистоннинг Кашмирдаги терактга Исломободнинг алоқаси борлиги ҳақидаги айбловларини рад этди.
7 майга ўтар кечаси Ҳиндистон мудофаа вазирлиги Пахалгамдаги терактга жавобан “Синдур” операциясини ўтказгани, Покистон ҳудудидаги "террорчилик инфратузилмаси"га зарба берганини маълум қилди. Вазирлик таъкидлашича, операция доирасида Покистоннинг бирорта ҳарбий объектига ҳужум қилинмаган. Ўз навбатида, Покистон ҳукумати Ҳиндистон Покистоннинг бешта аҳоли пунктига ҳужум қилгани, зарбалар оқибатида ўнлаб одамлар ҳалок бўлганини билдирди. Покистон Ташқи ишлар вазирлиги Исломобод тегишли жавоб бериш ҳуқуқини ўзида сақлаб қолишини маълум қилди.
Ҳиндистон ва Покистон 10 май куни соат 17:00 дан бошлаб қуруқликда, ҳавода ва денгизда барча отишмалар ва ҳарбий ҳаракатларни тўхтатишга келишиб олди. Бир неча соат ўтгач, Ҳиндистоннинг Жамму ва Кашмир иттифоқдош ҳудуди раҳбари Умар Абдулла Жамму ва Кашмирнинг ёзги пойтахти Сринагар шаҳри яқинида портлаш овозлари ва Ҳиндистон ҳаво мудофааси ишлари ҳақида хабар берди. Бироқ, кетма-кет иккинчи кеча Ҳиндистон армияси Покистон томонидан тартиб бузилишларини кузатмаётганини айтмоқда.
Изоҳ (0)