Тиктокер ва блогерлар рўйхатда йўқ: 30 ёшга тўлмасдан энг бадавлат тадбиркорларга айланган зумерлар

Ҳозирда рекорд даражадаги бадавлат бўлган ёш авлод, асосан, блогерлар ва инфлюенсерлардан иборат, деган қараш мавжуд, аммо ҳақиқатда бадавлат ёшларнинг аксарияти ижтимоий тармоқларни фаол юритмайди ва уларнинг суратини излаб топиш қийин.
Forbes 30 ёшгача бўлган энг бадавлат тадбиркорлар рўйхатини тузди. Спойлер: 2025 йил ҳолатига кўра энг бой ёшларнинг аксарияти ўз бойликларини оиласидан мерос қилиб олишган.

Иёганнес фон Баумбах
Фаолияти: фармацевтика компанияси Boehringer Ingelheim ҳаммуассиси
Ёши: 19
Мамлакат: Германия
Бойлиги: 5,4 миллиард доллар

Иёганнес фон Баумбах Boehringer Ingelheim фармацевтика компаниясининг бошқарувчиларидан бири ҳисобланади. Компания 1885 йилдан буён Баумбахлар оиласи томонидан юритилмоқда ва ҳозирда Германияда энг йирик дори-дармон ишлаб чиқарувчи тармоқ ҳисобланади. Фирманинг йиллик даромади 27,7 миллиард долларни ташкил этади. Ёш миллиардер жамоатчиликдан узоқ, шунинг учун унинг шахсий ҳаёти ҳақида кўп маълумотлар йўқ.

Клементе дел Веккё
Фаолияти: Ray-Ban ва Оаkley кўзойнакларини ишлаб чиқарувчи компаниянинг ҳаммуассиси
Ёши: 20
Мамлакат: Италия
Бойлиги: 6,6 миллиард доллар

Клементе 2022 йилда отасининг мероси орқали бойликка эга бўлди. Унинг отаси дунёдаги энг йирик кўзойнак ва линзалар ишлаб чиқарувчи Luxottica компаниясига асос солган. Клементе ҳозирда Delfin ҳолдинги улушининг 12,5 фоизига эгалик қилади. У Милан шаҳрида яшайди ва, эҳтимол, энг яхши ҳаётини кечирмоқда.

Софи Луиз Фильманн
Фаолияти: Fielmann Group кўзойнакларини ишлаб чиқарувчи компаниянинг ҳаммуассиси
Ёши: 30 
Мамлакат: Германия
Бойлиги: 2,8 миллиард доллар

2024 йилда отасининг вафотидан сўнг, Софи Fielmann Group компаниясининг катта  улушига эга бўлди. У ва акаси компанияга бошчилик қилиб, илм-фан ва санъат соҳаларида ташаббусларни қўллаб-қувватловчи хайрия фондини ташкил этди. Софи компанияда ишламаса ҳам, унинг, тахминан, учдан бир қисмини бошқаради.

Кевин Девид Леманн
Фаолияти: Drogerie Markt дорихоналар тармоғининг ҳаммуассиси
Ёши: 22
Мамлакат: Германия
Бойлиги: 3,6 миллиард доллар

Кевин — Германиянинг косметика ва соғлиқни сақлаш маҳсулотлари тармоғи — dm (Drogerie Markt)нинг меросхўри. 2017 йилда отасидан компаниянинг 50 фоиз улушини олган Кевиннинг бойлиги 2025 йилда 3,6 миллиард долларга етди. Кевин ва унинг отаси компаниянинг бошқарув жараёнларида иштирок этмасалар ҳам, уларнинг бойлиги йилдан йилга ошмоқда, чунки дм тармоғи бутун Европа бўйлаб минглаб нуқталарда мавжуд.

Заҳан Мистри
Фаолияти: Shapoorji Pallonji Group қурилиш конгломератининг топ менежери
Ёши: 23 
Мамлакат: Ҳиндистон
Бойлиги: 4 миллиард доллар

Заҳан ва унинг акаси оталари Сайрус Мистри вафотидан сўнг Shapoorji Pallonji Group (SP Group)ни қайта ташкил қилишга ва қарзларни ёпишга мажбур бўлган. 2022 йилда авиаташувда ҳалок бўлган оталарининг ўрнини босган Заҳан Warwick университетини тамомлаб, SP Group’да 25 фоиз улушга эга бўлди, Тата эса конгломератнинг 4,6 фоиз улушини қўлга киритди.

Фироз Мистри
Фаолияти: Shapoorji Pallonji Group қурилиш конгломератининг топ менежери
Ёши: 28 
Мамлакат: Ҳиндистон
Бойлиги: 4 миллиард доллар

Заҳан Мисрининг акаси Фироз ҳам SP Group’да ишлайди. У ва Заҳан ўзларининг 4,6 фоиз улушини Тата конгломератидан мерос қилиб олишган, аммо оилавий ички низолар туфайли улар бу улушларни сотиш ёки бошқариш ҳуқуқига эга эмас. 2024 йилда Мистри оиласининг бойлиги 41,4 миллиард долларга баҳоланди.

Эд Крейвен
Фаолияти: Stake криптоказиноларининг ҳаммуассиси
Ёши: 29 
Мамлакат: Австралия
Бойлиги: 2,8 миллиард доллар

Эд Крейвен бойлигини оилавий мерос эмас, балки ўзининг меҳнати билан топган рўйхатимиздаги ягона тадбиркор. 2017 йилда ўз ҳамкори билан дунёдаги энг йирик криптоказино Stake’ни яратган. 2024 йилда компаниянинг даромади 4,7 миллиард долларни ташкил этди.

Максимилиан фон Баумбах
Фаолияти: Boehringer Ingelheim фармацевтика компаниясининг ҳаммуассиси
Ёши: 27 
Мамлакат: Германия
Бойлиги: 5,4 миллиард доллар

Максимилиан фон Баумбах — Иоганнесс фон Баумбах каби Boehringer Ingelheim фармацевтика компаниясининг ҳаммуассиси. Компаниянинг умумий даромади 2023 йилда 27,7 миллиард долларни ташкил этди. Максимилиан бойлиги 2025 йилда 5,4 миллиард долларга етди.

Реми Дассо
Фаолияти: Dassault Aviation авиация компаниясининг ҳаммуассиси
Ёши: 23 
Мамлакат: Франция
Бойлиги: 2,8 миллиард доллар

Реми Дассо Dassault Aviation компаниясининг 2,5 фоиз акцияларига ва Dassault Systèmes дастурий таъминоти компаниясининг 4,1 фоиз акцияларига эга. Унинг компаниялар ривожига қандай ҳисса қўшгани ҳақида аниқ маълумотлар йўқ, лекин отасининг 2021 йилдаги вафотидан кейин бойликни мерос қилиб олган.