Ҳиндистондан етти йил аввал қочиб кетган миллиардер Меҳул Чокси Бельгияда ушланди. У Панжоб Миллий банкидан 1,6 миллиард доллардан ортиқ маблағни фирибгарлик йўли билан ўзлаштиришда гумон қилинмоқда. Бу ҳақда NDTV телеканали хабар берди.
Меҳул Чокси ва унинг жияни Нирав Моди Панжоб Миллий банки ходимлари билан тил бириктириб, банк активларидан мазкур суммани ўзлаштирганликда айбланиб, Ҳиндистон Марказий тергов бюроси томонидан қидирувга берилган эди. Ҳиндистон тарихидаги бу энг йирик фирибгарлик 2017 йил охирида фош этилган. Шундан сўнг 2018 йил январида Чокси яқин қариндошлари билан Ҳиндистондан қочиб кетган. Унинг қаердалиги номаълум бўлиб, Интерпол томонидан қидирув эълон қилинган эди.
Бельгия Адлия вазирлиги душанба куни NDTV телеканалига тасдиқлашича, қочоқ ҳиндистонлик тадбиркор Чокси 12 апрелда ҳибсга олинган.
“У кейинги суд жараёнини кутиш учун ушлаб турилмоқда. Унга адвокатнинг кириши таъминланган”, дея Бельгия томонининг баёнотидан иқтибос келтиради телеканал.
Ҳиндистон Бельгиядан гумонланувчини экстрадиция қилишни сўраган. Адлия вазири Аржун Рам Мегхвалнинг таъкидлашича, Бельгияда Ҳиндистон одил судловидан яширинган Чоксининг ҳибсга олиниши Ҳиндистон бош вазири Нарендра Моди ҳукумати давридаги ҳинд дипломатиясининг ғалабаси ҳисобланади.
Изоҳ (0)