9 май кунига ўтар кечаси Покистон ҳарбийлари Ҳиндистоннинг шимолий ва ғарбий ҳудудларидаги 36 та объектга мувофиқлаштирилган ҳужум доирасида 300-400 та дрон учирган. Бу ҳақда Hindustan Times газетаси маълум қилди.
“Қуролли кучларимиз зенит қуроллари ва бошқа воситалар ёрдамида кўплаб дронларни йўқ қилди”, дейди Ҳиндистон Қуролли кучлари вакили Виомика Сингх.
Сингхнинг сўзларига кўра, бунга жавобан ҳинд ҳарбийлари Покистондаги тўртта ҳаво мудофааси позициясига учувчисиз учиш аппаратларини йўллаган ва улардан бири душман радарини йўқ қилишга эришган.
Hindustan Times манбаларининг таъкидлашича, 9 майга ўтар кечаси Покистоннинг дронлар ва ракеталардан фойдаланган ҳаво ҳужумини қайтаришда Ҳиндистон S-400 зенит-ракета комплекслари, Barak-8 ва Akash зенит-ракеталарини, шунингдек, Мудофаа тадқиқотлари ва ишланмалари ташкилотининг дронга қарши кураш технологияларини қўллаган.
Таъкидланишича, сўнгги икки кун ичида Деҳлидаги Индира Ганди номидаги Халқаро аэропорти 228 та рейсни бекор қилган. Расмийлар мамлакатнинг 27 та аэропортида фуқаро самолётларини қабул қилишни 10 майгача тўхтатган.
Чипта талабининг ошиши муносабати билан Indian Railways компанияси Жамму ва Удхампур шаҳарларидан Нью Деҳлига қўшимча поездларни йўлга қўйган.
Ҳиндистон бош вазири Нарендра Моди жума куни Покистон билан чегарадош Гужарат штати бош вазири Бҳупендра Пател билан боғланиб, кўрилаётган хавфсизлик чораларини муҳокама қилди. Пателнинг айтишича, бош вазир штатнинг фавқулодда вазиятга ва аҳолини ҳимоя қилишга тайёргарлик даражасини сўраган.
Ҳиндистон ва Покистон ўртасидаги муносабатлар 22 апрель куни Ҳиндистон шимолида бир гуруҳ жангарилар сайёҳлар кўп тўпланадиган жойда одамларга ўт очганидан сўнг кескинлашди. Воқеада 26 киши ҳалок бўлди. Ҳиндистон теракт учун жавобгарликни Покистон томонига юклади.
7 майга ўтар кечаси Ҳиндистон ҳарбийлари Покистон ҳудудидаги инфратузилма ва Кашмирнинг Исломобод назоратидаги ҳудудларига авиазарбалар берди. Покистон бунга жавоб зарбалари билан чиқди.
Изоҳ (0)