Сурхондарё вилояти Термиз шаҳрида 26—27 март кунлари транспорт масалалари бўйича Ўзбекистон, Афғонистон ва Покистон ўртасида учрашув бўлиб ўтди. Бу ҳақда Транспорт вазирлиги хабар қилди.
Қайд этилишича, Ўзбекистон экспорт ва импорт юкларининг Шарқий Осиё давлатларидан узлуксиз логистикасини ташкил этиш мақсадида Ўзбекистон, Афғонистон Ислом республикаси ва Покистон ислом республикасининг йирик транспорт-логистика компаниялари, Халқаро автомобиль ташувчилари уюшмаси ҳамда транспорт ва божхона идоралари вакиллари иштирокида транспорт масалалари бўйича уч томонлама ишчи гуруҳ учрашуви ўтказилган. Учрашувда Ўзбекистон, Афғонистон ва Покистон давлатлари ҳудуди бўйлаб автомобиль транспортида халқаро юк ташувлари жараёнида юзага келаётган муаммолар ва уларни ҳал этиш масалалари муҳокама этилган.
Аввалроқ Ўзбекистонга биринчи марта Покистон ва Афғонистон орқали Ҳиндистондан юклар келтирилганди. 140 тонна юкка эга бўлган, асосан, ҳинд шакарини олиб кетаётган юк машиналари 16 март куни Кобулдан Ўзбекистон пойтахти Тошкентга етказилган.
Шавкат Мирзиёев март ойи бошида Покистон пойтахти Исломободга икки кунлик расмий ташрифи чоғида бир қатор келишувларни имзолаган эди. Покистон томонининг таъкидлашича, Ўзбекистонга йўл олган Ҳиндистон тижорий жўнатмалари келишув бўйича хусусий уюштирилган фаолият бўлиб, тўртта давлатнинг ҳеч бирида ҳукумат иштироки йўқ.
Изоҳ (0)