Россияда 9 май куни бўлиб ўтадиган Ғалаба парадида тожикистонлик ҳарбийлар ҳам иштирок этади. Бу ҳақда Тожикистон Мудофаа вазирлиги AsiaPlus агентлигига хабар берди.
Россия пойтахтига Қизил майдонда саф тортиб юриш учун қанча аскар келиши ҳозирча номаълум. Ғалабанинг юбилей тантаналарига 19 мамлакат, жумладан, собиқ Иттифоқнинг 7 давлатидан ҳарбий хизматчилар таклиф этилгани айтилмоқда. Айни пайтда 10 та давлат ҳарбийлари ўз иштирокини тасдиқлаган.
Марказий Осиё давлатларидан, Тожикистондан ташқари, Қирғизистон ҳам ўз ҳарбийларининг Ғалаба парадида иштирок этишини тасдиқлади. Бу мамлакатдан 80 нафар аскар Москвадаги парадга боради.
Россия президенти матбуот котиби Дмитрий Песковга кўра, Украинадаги урушда қатнашганлар ҳам парадда қатнашади. Москвага 9 май байрами муносабати билан кўплаб жаҳон етакчилари, жумладан, Хитой раиси Си Цзиньпин, Венесуэла президенти Николас Мадуро, Бразилия раҳбари Лула да Сильва, Сербия президенти Александр Вучич, шунингдек, Ҳиндистон ва Словакия бош вазирлари Нарендра Моди ҳамда Роберт Фицо ташриф буюриши режалаштирилган.
Бундан ташқари, Ўзбекистон президенти Шавкат Мирзиёев, Беларусь раҳбари Александр Лукашенко, Озарбайжон раҳбари Илҳом Алиев, Қозоғистон етакчиси Қосим-Жўмарт Тўқаев, Қирғизистон президенти Садир Жапаров ва Тожикистон раҳбари Эмомали Раҳмон ҳам иштирок этиши кутилмоқда.
Изоҳ (0)