Покистон ва Ҳиндистон ўртасидаги чегара ҳудудларида юзага келган беқарор вазият туфайли 8–9 май кунлари HY461/462 рейслари (Тошкент—Лахор—Тошкент йўналиши) мажбурий бекор қилинади. Бу ҳақда Uzbekistan Airways матбуот хизмати хабар берди.
Бекор қилинган рейс йўловчилари чипта нархини қайтариб олиш ёки жаримасиз тарзда бошқа саналарга қайта брон қилиш учун мурожаат қилишлари мумкинлиги таъкидланди.
Авиакомпания, шунингдек, Яқин Шарқ ва Осиё-Тинч океани минтақаси йўналишларида парвозлар жадвалига ўзгартиришлар киритилишини маълум қилди.
Таъкидланишича, парвозлар хавфсизлигини максимал даражада таъминлаш мақсадида, шунингдек, Покистон ва Ҳиндистон чегараси яқинидаги ҳаво ҳудудидан вақтинча ўтишга қўйилган чекловлар сабабли Дели, Мумбай, Бангкок, Куала Лумпур, Пхукет каби шаҳарлар йўналишидаги рейсларнинг маршрутлари ўзгартирилади.
Шаҳарлар рўйхати янгиланиши, маршрутларга қўшимча тузатишлар киритилиши мумкинлиги қўшимча қилинган. Дастлабки маълумотларга кўра, учиш вақти 1,5 соат ва йўналишга қараб ундан ортиққа узайиши мумкин.
Ҳиндистон ва Покистон бир-бирига авиазарба йўллади
Ҳиндистон расмийлари 7 майга ўтар кечаси Покистондаги, шунингдек, Кашмирнинг Покистон қисмидаги “террорчилик” инфратузилмасига ҳужум қилиб, “Синдур” операциясини бошлаганини эълон қилди. Ҳужумда фақат “террорчилик” объектлари нишонга олингани даъво қилинди. Покистон мазкур маълумотни рад этиб, зарбалар террорчиларга эмас, балки тинч аҳоли яшайдиган ҳудудларга берилганини маълум қилди.
Изоҳ (0)