Покистон ва Ҳиндистон чегараси яқинидаги ҳаво ҳудудидан фойдаланишга қўйилган вақтинчалик чекловлар сабаб Uzbekistan Airways парвоз жадвалида мажбурий ўзгаришлар бўлади.
Авиакомпания матбуот хизматининг маълум қилишича, мазкур ўзгаришлар қуйидаги йўналишларга тааллуқли: Тошкент—Деҳли, Мумбай, Лахор, Бангкок, Куала Лумпур, Пхукет ва ушбу шаҳарлар билан боғлиқ қайтиш йўналишлари. Баъзи ҳолатларда учиш вақти ўртача 1,5 соатга ёки ундан кўпроққа ошиши мумкин.
Агар рейс бекор қилинса, йўловчиларга яқин саналарга қайта брон қилиш (жаримасиз) ёки авиабилет суммасини тўлиқ қайтариш имконияти тақдим этилади.
Тошкентдан Деҳли, Мумбай ва Лахор шаҳарларига рейслар бўйича қўшимча маълумотлар парвозлар жадвали тўлиқ янгилангандан сўнг тақдим этилади.
“Биз йўловчиларимиз учун аниқ жадвал ва саёҳатнинг ишончли бўлиши қанчалик муҳим эканини яхши тушунамиз ва ташқи омилларга қарамасдан барқарор парвозларни таъминлаш учун бор кучимизни сарфламоқдамиз”, дейилади авиакомпания хабарида.
Компания мавжуд шароитда рейслар ўз вақтида амалга оширилишда давом этаётгани, бироқ хавфсизлик нуқтайи назаридан йўналишларда қўшимча ўзгаришлар, жадвалдаги тузатишлар ва бошқа мослашувлар бўлиши эҳтимолдан ҳоли эмаслигини қайд этиб ўтди.
Юқоридаги манзилларга сафар режалаштираётган йўловчиларга актуал жадвални олдиндан текшириш ва имконият бўлса, сафарни, айниқса, трансферли парвозлар ёки бизнес учрашувларни қўшимча вақт захираси билан режалаштириш тавсия қилинди.
Покистон ва Ҳиндистон ўртасидаги чегара ҳудудларида юзага келган беқарор вазият туфайли 8–9 май кунлари Тошкентдан Лахорга учадиган рейслар бекор қилинганди. Uzbekistan Airways, шунингдек, Яқин Шарқ ва Осиё-Тинч океани минтақаси йўналишларида парвозлар жадвалига ўзгартиришлар киритилишини маълум қилганди.
Изоҳ (0)